នៅថ្ងៃព្រហស្បតិ៍នេះ សភាលីបង់ បានកោះប្រជុំនៅទីក្រុង Beirut ដើម្បីបោះឆ្នោតជ្រើសរើសប្រមុខរដ្ឋថ្មី ដែលមានគោលដៅបំពេញតំណែងមួយនេះដែលនៅទំនេរចាប់តាំងពីឆ្នាំ ២០២២រហូតមក ក្នុងនោះប្រភពនយោបាយ បានរំពឹងថា អគ្គមេបញ្ជាការកងទ័ពលីបង់លោក Joseph Aoun នឹងត្រូវបានជ្រើសតាំង ។

ប្រធានសភាលោក Nabih Berri បានផ្អាកអង្គប្រជុំសម្រាប់ការពិគ្រោះយោបល់រយៈពេល ២ម៉ោង ក្រោយជុំដំបូងនៃការបោះឆ្នោតមិនអាចរកបានសំឡេងឆ្នោតគ្រប់គ្រាន់សម្រាប់លោក Aoun ។

លោក Aoun ត្រូវការសំឡេងគាំទ្រ ៨៦សំឡេងនៅក្នុងចំណោមតំណាងរាស្រ្ត ១២៨រូបរបស់សភា ដើម្បីទទួលបានការជ្រើសតាំងជាប្រមុខរដ្ឋថ្មី ។ លោករកបានសំឡេងឆ្នោតមិនគ្រប់គ្រាន់នោះទេនៅជុំដំបូង ពោលគឺលោកទទួលបាន ៧១សំឡេងប៉ុណ្ណោះ ។

ប៉ុន្តែប្រភពនយោបាយជាន់ខ្ពស់ចំនួន ២ បាននិយាយថា លោក Aoun ទំនងជាឈ្នះការបោះឆ្នោតជុំទី ២នាពេលក្រោយក្នុងថ្ងៃព្រហស្បតិ៍នេះ ពេលដែលតំណាងរាស្រ្តមកពីក្រុមហេសបូឡានិកាយស៊ីអ៊ីត និងសម្ព័ន្ធមិត្តដែលជាក្រុមចលនា Amal ត្រូវបានគេរំពឹងថា នឹងបោះឆ្នោតឲ្យរូបលោក ក្រោយពួកគេបោះឆ្នោតមិនគូសសន្លឹកឆ្នោតនៅជុំដំបូង ៕