វិមានក្រឹមឡាំង នៅថ្ងៃព្រហស្បតិ៍ (ទី៩ ខែមករា) នេះ បានឲ្យដឹងថា រុស្ស៊ីមានផលប្រយោជន៍ជាតិជាយុទ្ធសាស្ត្រ នៅតំបន់អាកទិក នៅពេលដែលត្រូវបានសួរឲ្យអត្ថាធិប្បាយពាក់ព័ន្ធទៅនឹងការលើកឡើងរបស់ប្រធានាធិបតីជាប់ឆ្នោតអាមេរិក លោក Donald Trump អំពីការទិញដែនដី Greenland ការរួមបញ្ចូលប្រទេសកាណាដា និងការគ្រប់គ្រងលើព្រែកជីកប៉ាណាម៉ា។

គួរបញ្ជាក់ថា លោក Trump ដែលត្រូវចូលកាន់តំណែងនៅថ្ងៃទី២០ ខែមករា បានបដិសេធមិនច្រានចោលការប្រើប្រាស់វិធានការយោធា ឬសេដ្ឋកិច្ច ដើម្បីអនុវត្តការទិញយកព្រែកជីកប៉ាណាម៉ា និងដែនដី Greenland ជាផ្នែកនៃរបៀបវារៈវាតទីនិយមយ៉ាងទូលំទូលាយដែលលោកបានផ្សព្វផ្សាយឲ្យដឹង ចាប់តាំងពីបានឈ្នះការបោះឆ្នោតថ្ងៃទី៥ ខែវិច្ឆិកា។ ជាមួយគ្នានេះ លោក Trump ក៏បានបង្ហាញពីគំនិតនៃការធ្វើឲ្យកាណាដាប្រែក្លាយទៅជារដ្ឋរបស់សហរដ្ឋអាមេរិក និងបានសន្យាថា នឹងប្តូរឈ្មោះឈូងសមុទ្រម៉ិកស៊ិកទៅជាឈូងសមុទ្រអាមេរិក។

នៅពេលត្រូវបានសួរអំពីការអត្ថាធិប្បាយរបស់លោក Trump អំពីដែនដី Greenland និងកាណាដា វិមានក្រឹមឡាំងបានប្រាប់ថា ប្រទេសរុស្ស៊ីដែលមានផ្ទៃដីឆ្នេរអាកទិកលាតសន្ធឹងវែងឆ្ងាយបំផុត កំពុងតាមដានមើលយ៉ាងដិតដល់នូវ «ការវិវត្តយ៉ាងខ្លាំង» នៃស្ថានការណ៍នេះ។

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា៖ «អាក់ទិក គឺជាតំបន់នៃផលប្រយោជន៍ជាតិរបស់យើង ពោលគឺជាផលប្រយោជន៍យុទ្ធសាស្ត្ររបស់យើង។ យើងចាប់អារម្មណ៍ក្នុងការរក្សាបរិយាកាសសន្តិភាព និងស្ថិរភាព នៅក្នុងតំបន់អាកទិក។ យើងកំពុងតាមមើលការវិវត្តនៃស្ថានការណ៍នេះយ៉ាងដិតដល់ ប៉ុន្តែរហូតមកដល់ពេលនេះ អរគុណព្រះជាម្ចាស់ ដែលគ្រប់យ៉ាងនៅត្រឹមកម្រិតនៃវោហារសាស្ត្រ»។

លោក Peskov បាននិយាយថា ការប៉ុនប៉ងរបស់សហរដ្ឋអាមេរិក ដើម្បីទទួលបានដែនដី Greenland ដែលមានតាំងពីសតវត្សរ៍ទី១៩ គឺជាបញ្ហា រវាងសហរដ្ឋអាមេរិក និងដាណឺម៉ាក ប៉ុន្តែលោកបានកត់សម្គាល់ថា អឺរ៉ុបកំពុងមានប្រតិកម្មយ៉ាងប្រុងប្រយ័ត្ន ចំពោះសេចក្តីថ្លែងការណ៍របស់លោក Trump៕