អ្នកស៊ើបអង្កេតរបស់អង្គការសហប្រជាជាតិ បានសម្តែងក្តីសង្ឃឹម កាលពីថ្ងៃព្រហស្បតិ៍ ទី៩ ខែមករាចំពោះ «ទំនាក់ទំនងល្អ» ជាមួយមេដឹកនាំថ្មីរបស់ប្រទេសស៊ីរី ខណៈលោកបានបញ្ចប់ដំណើរទស្សនកិច្ចលើកដំបូងធ្វើឡើងដោយក្រុមស៊ើបអង្កេតរបស់លោក ដែលត្រូវបានរារាំងដោយប្រធានាធិបតី បណ្តេញចេញពីតំណែង លោក Bashar al-Assad កាលពី១៣ឆ្នាំកន្លងទៅនេះ។

លោក Hanny Megally មកពីគណៈកម្មការស៊ើបអង្កេតរបស់អង្គការសហប្រជាជាតិលើប្រទេសស៊ីរី (COI) បាននិយាយដោយសុទិដ្ឋិនិយមថា «យើង មានអ្នកចូលរួមក្នុងកិច្ចពិភាក្សា ដែលយើងអាចធ្វើការជាមួយ» «វាគឺជាការភ្ញាក់ផ្អើលខ្លាំង ដែលយើងស្ថិតនៅក្នុងទីក្រុងដាម៉ាស»។

លោកបាននិយាយទៅកាន់សារព័ត៌មាន AFP ថា «យើងសង្ឃឹមថា នឹងអាចមានទំនាក់ទំនងល្អជាមួយអាជ្ញាធររបស់ប្រទេសស៊ីរីនៅពេលនេះ»។ លោក Megally និយាយថា គណៈកម្មការស៊ើបអង្កេតរបស់អង្គការសហប្រជាជាតិលើប្រទេសស៊ីរី (COI) បាននឹងកំពុងប្រមូលភស្តុតាងនៃឧក្រិដ្ឋកម្ម ដែលបានប្រព្រឹត្តនៅក្នុងប្រទេសស៊ីរីចាប់តាំងពីដើមដំបូងនៃសង្គ្រាមស៊ីវិល បង្កឡើងដោយការបង្ក្រាបរបស់រដ្ឋាភិបាល លោក Assad លើការតវ៉ាគាំទ្រលទ្ធិប្រជាធិបតេយ្យក្នុងឆ្នាំ២០១១។

លោក Assad ពុំដែលផ្តល់ការអនុញ្ញាតឱ្យអ្នកស៊ើបអង្កេតចូលទៅក្នុងប្រទេសស៊ីរីឡើយ ប៉ុន្តែអាជ្ញាធរថ្មី បានធ្វើភ្លាមៗ។

កាលពីពេលមុន គណៈកម្មការស៊ើបអង្កេតរបស់អង្គការសហប្រជាជាតិលើប្រទេសស៊ីរី (COI) បានធ្វើការស៊ើបអង្កេតពីចម្ងាយ។ ដោយផ្អែកលើបទសម្ភាសន៍ជាមួយមនុស្សរាប់ពាន់នាក់ និងឯកសារឯកសារនានា គណៈកម្មការ បានចងក្រងបញ្ជីឈ្មោះអ្នកប្រព្រឹត្តដែលសង្ស័យចំនួន៤.០០០នាក់ នៃឧក្រិដ្ឋកម្មធ្ងន់ធ្ងរ។ ក្នុងអំឡុងដំណើរទស្សនកិច្ចរយៈពេលប្រាំថ្ងៃ លោក Megally បាននិយាយថា លោក បានទៅធ្វើទស្សនកិច្ចនៅមជ្ឈមណ្ឌលឃុំឃាំងដ៏ល្បីអាសោចជាច្រើនកន្លែង និងទីតាំងផ្នូរធំៗនៅជុំវិញទីក្រុងដាម៉ាស និងបានជួបជាមួយមន្ត្រីក្រសួងយុត្តិធម៌ និងការបរទេស។