គណបបក្ស វែន វេណេស៊ុយអេឡា (Vente Venezuela) បាននិយាយថា មេដឹកនាំគណបក្សប្រឆាំងរបស់ប្រទេសវេណេស៊ុយអេឡា លោកស្រី Maria Corina Machado ត្រូវបានដោះលែងវិញ ភ្លាមៗបន្ទាប់ពីលោកស្រី ត្រូវបានឃុំខ្លួនក្នុងពេលមានការបាញ់កាំភ្លើង ខណៈចាកចេញពីការតវ៉ានៅភាគខាងកើតទីក្រុងការ៉ាកាស។

បាតុកម្មរបស់គណបក្សប្រឆាំង បានធ្វើឡើងនៅទូទាំងប្រទេស ក្នុងកិច្ចខិតខំប្រឹងប្រែងរយៈពេលដប់មួយម៉ោង ដើម្បីដាក់សម្ពាធលើប្រធានាធិបតី លោក Nicolas Maduro នៅមុនការចូលកាន់តំណែងអាណត្តិទីបីរបស់លោក នៅថ្ងៃសុក្រ ទី១០ មករា នេះ។

លោកស្រី Machado ត្រូវបានឃុំខ្លួន បន្ទាប់ពីបង្ហាញខ្លួនជាសាធារណៈលើកដំបូងក្នុងរយៈពេលប៉ុន្មានខែកន្លងទៅនេះ ដែលជំរុញឱ្យសម្ព័ន្ធមិត្តរបស់លោកស្រី អតីតបេក្ខជនប្រធានាធិបតី លោក Edmundo Gonzalez ទាមទារឱ្យមានការដោះលែងលោកស្រីជាបន្ទាន់។

គណបក្ស Vente Venezuela បាននិយាយនៅក្នុងសេចក្តីថ្លែងការណ៍នៅលើបណ្តាញផ្សព្វផ្សាយសង្គមថា ក្នុងអំឡុងពេលឃុំខ្លួន លោកស្រី Machado ត្រូវបានបង្ខំឱ្យថតវីដេអូជាច្រើន។

មន្ត្រីរដ្ឋាភិបាលរួមទាំងរដ្ឋមន្ត្រីក្រសួងមហាផ្ទៃ លោក Diosdado Cabello បាននិយាយថា ការចាប់ខ្លួនលោកស្រីត្រូវបានប្រឌិតឡើងដោយក្រុមគណបក្សប្រឆាំង ក្នុងគោលបំណងបង្កើតការគាំទ្រសម្រាប់ចលនារបស់លោកស្រី។