ប្រធានាធិបតីប្រទេសរ៉្វាន់ដា លោកផូល ខាហ្កាម៉េ(Paul Kagame) កាលពីថ្ងៃព្រហស្បតិ៍ ទី៩ ខែមករា បានចោទប្រកាន់សាធារណរដ្ឋប្រជាធិបតេយ្យកុងហ្គោ ថា បានបង្អាក់កិច្ចប្រជុំ ដែលបានគ្រោងធ្វើនៅខែក្នុងធ្នូ នៅទីក្រុងឡោនដា(Luanda) ប្រទេសអង់ហ្គោឡា ក្នុងគោលបំណងបញ្ចប់ការប្រយុទ្ធគ្នា នៅភាគខាងកើតប្រទេសកុងហ្គោ។

ជំនួបរវាង លោក ខាហ្កាម៉េ(Kagame) និងប្រធានាធិបតីកុងហ្គោ លោក Felix Tshisekedi ត្រូវបានកំណត់ពេលនៅថ្ងៃទី ១៥ ខែធ្នូ បន្ទាប់ពីមានការចរចាជាច្រើនខែ។ លោក Kagame បាននិយាយក្នុងសន្និសីទសារព័ត៌មានថា ប្រទេសកុងហ្គោ បានបដិសេធម្តងហើយម្តងទៀតនូវជំហរដែលបានព្រមព្រៀងគ្នា។

លោក Kagame និយាយថា «ក្រុមរដ្ឋមន្ត្រីជួបគ្នា ពួកគេពិភាក្សាគ្នា ហើយនៅពេលដែលពួកគេជិតឈានដល់ចំណុចសំខាន់អ្វីមួយ រដ្ឋមន្ត្រីរបស់ប្រទេសកុងហ្គោ ចេញទៅខាងក្រៅ និយាយទូរស័ព្ទ ហើយត្រឡប់ចូលមកវិញ និយាយថា «NO»។

កិច្ចប្រជុំកំពូលនេះ ត្រូវបានគេរំពឹងថានឹងមានលទ្ធផលនៅក្នុងកិច្ចព្រមព្រៀងមួយ ដើម្បីបញ្ចប់ការបះបោររបស់ក្រុម M23 រយៈពេលជិតបីឆ្នាំនៅភាគខាងកើតប្រទេសកុងហ្គោ។

លោក Kagame និយាយថា លោកគាំទ្រការបន្តកិច្ចខិតខំប្រឹងប្រែងសន្តិភាព ប៉ុន្តែបានទទូចថា ពួកគេត្រូវតែដោះស្រាយបញ្ហាក្រុមឧទ្ទាមប្រឆាំង ដែលមានមូលដ្ឋាននៅប្រទេសកុងហ្គោ។

ប្រទេសកុងហ្គោ កាលពីពេលមុន បានច្រានចោលការចរចាដោយផ្ទាល់ជាមួយក្រុមឧទ្ទាម M23 ដែលខ្លួនចាត់ថ្នាក់ជាក្រុមភេរវករ។