ការសិក្សាមួយដែលបានចេញផ្សាយកាលពីថ្ងៃព្រហស្បតិ៍ (០៩ មករា) បានឱ្យដឹងថា តួលេខផ្លូវការរបស់ប៉ាឡេស្ទីននៃចំនួនអ្នកស្លាប់ដោយផ្ទាល់នៅក្នុងសង្គ្រាមអ៊ីស្រាអែល-ក្រុមហាម៉ាស ទំនងជាបានរាប់ខ្វះ ៤១% នៃចំនួនអ្នកស្លាប់ពិតប្រាកដ រហូតដល់ពាក់កណ្តាលឆ្នាំ២០២៤ នៅពេលហេដ្ឋារចនាសម្ព័ន្ធថែទាំសុខភាពរបស់តំបន់ហ្កាហ្សាស្ទ្រីប មិនដំណើរការ។

ដោយប្រើវិធីសាស្រ្តវិភាគស្ថិតិ ក្រុមអ្នកស្រាវជ្រាវបានស្វះស្វែងរកការវាយតម្លៃចំនួនអ្នកស្លាប់ពីយុទ្ធនាការផ្លូវអាកាស និងជើងគោករបស់អ៊ីស្រាអែល នៅតំបន់ហ្កាហ្សា ក្នុងពេល ៩ខែដំបូងនៃសង្រ្គាម ចន្លោះខែតុលា ឆ្នាំ២០២៣ ដល់ចុងខែមិថុនា ឆ្នាំ២០២៤។

ពួកគេបានប៉ាន់ប្រមាណថា មានអ្នកស្លាប់ចំនួន ៦៤.២៦០នាក់ ដោយសារតែរបួសផ្លូវកាយផ្លូវចិត្តក្នុងអំឡុងពេលនេះ ឬប្រហែល ៤១% ខ្ពស់ជាងតួលេខផ្លូវការរបស់ក្រសួងសុខាភិបាលប៉ាឡេស្ទីន។ ការសិក្សានេះនិយាយថា ចំនួន ៥៩,១% នៃអ្នកស្លាប់គឺជាស្ត្រី កុមារ និងមនុស្សដែលមានអាយុលើសពី ៦៥ឆ្នាំ ប៉ុន្តែមិនបានផ្តល់នូវការប៉ាន់ស្មាននៃចំនួនយុទ្ធជនប៉ាឡេស្ទីនក្នុងចំណោមអ្នកស្លាប់ទេ។

យោងតាមមន្ត្រីសុខាភិបាលប៉ាឡេស្ទីនបានឱ្យដឹងថា មនុស្សជាង ៤៦.០០០នាក់ ត្រូវបានសម្លាប់នៅក្នុងសង្គ្រាមនៅតំបន់ហ្កាហ្សា។ ការសិក្សារបស់ទិនានុប្បវត្តិ Lancet ចេញដោយអ្នកសិក្សាទិន្នន័យនៅទីក្រុងឡុងដ្រ៍ សាកលវិទ្យាល័យ Yale និងស្ថាប័នជាច្រើនទៀតនេះ បាននិយាយថា សមត្ថភាពរបស់ក្រសួងសុខាភិបាលប៉ាឡេស្ទីន ក្នុងការរក្សាកំណត់ត្រាមរណភាពតាមប្រព័ន្ធអេឡិចត្រូនិច បានបង្ហាញឱ្យឃើញពីភាពជឿជាក់កាលពីមុន ប៉ុន្តែក្រោយមកបានធ្លាក់ចុះ ក្រោមយុទ្ធនាការយោធាអ៊ីស្រាអែល៕