រដ្ឋធានីញូវដេលី របស់ប្រទេសឥណ្ឌា ត្រូវបានគ្របដណ្ដប់ដោយផ្សែងអ័ព្ទយ៉ាងក្រាស់នៅថ្ងៃសុក្រ (១០ មករា) នេះ ដោយកាត់បន្ថយកម្រិតនៃការមើលឃើញដល់សូន្យក្នុងតំបន់មួយចំនួន និងរំខានដល់ជើងហោះហើរជាច្រើននៅអាកាសយានដ្ឋានសំខាន់។

ការិយាល័យអាកាសធាតុរបស់ឥណ្ឌា បានចេញការជូនដំណឹងពណ៌លឿងទុំសម្រាប់ទីក្រុងដេលី នៅថ្ងៃសុក្រ ដែលជាកម្រិតព្រមានខ្ពស់បំផុតទីពីរ ដោយព្យាករថានឹងមានអ័ព្ទពីកម្រិតក្រាស់ធម្មតា ដល់ក្រាស់ខ្លាំង នៅក្នុងតំបន់ជាច្រើនដែលអាចប៉ះពាល់ដល់អាកាសយានដ្ឋាន ផ្លូវហាយវេ និងផ្លូវរថភ្លើងក្នុងតំបន់នានា។

អាជ្ញាធរអាកាសយានដ្ឋានបាននិយាយនៅលើគេហទំព័រប្រព័ន្ធផ្សព្វផ្សាយសង្គម X ថា ការចេញដំណើររបស់ក្រុមហ៊ុនអាកាសចរណ៍ត្រូវបានរងផលប៉ះពាល់ដោយអ័ព្ទដ៏ក្រាស់ឃ្មឹកនោះ ហើយបានព្រមានថា ជើងហោះហើរដែលខ្វះប្រព័ន្ធរុករក CAT III ដែលអាចឱ្យការចុះចតបានទោះបីជាភាពមើលឃើញទាបក៏ដោយ អាចប្រឈមនឹងការលំបាកក្នុងអំឡុងចុះចត។

ទីក្រុងដេលី ដែលបាននិងកំពុងទប់ទល់នឹងផ្សែងអ័ព្ទ និងគុណភាពខ្យល់មិនល្អ ចាប់តាំងពីដើមរដូវរងាមក ជាប់ចំណាត់ថ្នាក់ទី២ ក្នុងចំណោមរដ្ឋធានីដែលមានកង្វក់ខ្យល់ ឬការបំពុលខ្យល់ខ្លាំងបំផុតរបស់ពិភពលោក នៅក្នុងចំណាត់ថ្នាក់ផ្សាយផ្ទាល់នៅថ្ងៃសុក្រសប្ដាហ៍នេះ ដោយក្រុមពិនិត្យមើលគុណភាពខ្យល់ IQAir របស់ស្វីស៕