គណបក្សសេរីនិយមរបស់នាយករដ្ឋមន្រ្តីកាណាដា លោក Justin Trudeau ដែលកំពុងចាកចេញពីតំណែង បាននិយាយកាលពីល្ងាចថ្ងៃព្រហស្បតិ៍ (០៩ មករា) ថា ខ្លួននឹងជ្រើសរើសមេដឹកនាំថ្មីនៅថ្ងៃទី០៩ ខែមីនា នៅមុនការបោះឆ្នោតឆ្នាំ២០២៥ ដែលការស្ទង់មតិបង្ហាញថា គណបក្សនេះនៅក្នុងទីតាំងទន់ខ្សោយខ្លាំង។

លោកនាយករដ្ឋមន្ត្រី Trudeau បានប្រកាសកាលពីថ្ងៃចន្ទសប្ដាហ៍នេះថា លោកនឹងចុះចេញពីតំណែងនៅប៉ុន្មានខែខាងមុខ បន្ទាប់ពីកាន់អំណាចរយៈពេល ៩ឆ្នាំ ដោយយល់ព្រមចុះញ៉មនឹងសម្ពាធពីសមាជិកសភា ដែលព្រួយបារម្ភចំពោះការគាំទ្រធ្លាក់ចុះរបស់គណបក្ស នៅក្នុងការស្ទង់មតិមុនការបោះឆ្នោត។

លោក Trudeau បាននិយាយថា លោកនឹងបន្តធ្វើជានាយករដ្ឋមន្ត្រី និងជាមេដឹកនាំសេរីនិយម រហូតដល់បក្សជ្រើសរើសប្រធានថ្មី។ ក្រុមប្រឹក្សាភិបាលជាតិរបស់បក្សនេះបានជួបប្រជុំគ្នាជាផ្លូវការនៅល្ងាចថ្ងៃព្រហស្បតិ៍ ដើម្បីពិភាក្សា និងគូសបញ្ជាក់អំពីច្បាប់ដំបូងនៃការប្រកួតប្រជែងតំណែងថ្នាក់ដឹកនាំនាពេលខាងមុខ។

គណបក្សនិយាយថា ការបោះឆ្នោតមេដឹកនាំនឹងបញ្ចប់នៅថ្ងៃទី០៩ ខែមីនា ហើយមេដឹកនាំថ្មីនឹងត្រូវប្រកាសនៅថ្ងៃដដែលនោះ។ សារព័ត៌មាន The Globe and Mail បានរាយការណ៍កាលពីល្ងាចថ្ងៃព្រហស្បតិ៍ថា អតីតរដ្ឋមន្ត្រីហិរញ្ញវត្ថុ លោកស្រី Chrystia Freeland និងអតីតធនាគារកណ្តាល លោក Mark Carney បានត្រៀមខ្លួនប្រជែងតំណែងដឹកនាំបក្សសេរីនិយម ខណៈរដ្ឋមន្ត្រីការបរទេស លោកស្រី Melanie Joly និងរដ្ឋមន្ត្រីច្នៃប្រឌិត លោក François-Philippe Champagne នៅតែមិនប្រាកដក្នុងចិត្តថាតើត្រូវចូលរួមដែរឬទេ៕