អតីតនាយករដ្ឋមន្ត្រីជប៉ុន លោក ស៊ីហ្គា យូស្សីហ៊ីដេ(Suga Yoshihide) បាននិយាយថា វាមានសារៈសំខាន់ក្នុងការកសាងទំនាក់ទំនងជិតស្និទ្ធរវាងនាយករដ្ឋមន្ត្រី លោក Ishiba Shigeru និងប្រធានាធិបតីសហរដ្ឋអាមេរិក លោក Donald Trump ដើម្បីពង្រឹងសម្ព័ន្ធភាពទ្វេភាគី។

លោក Suga បាននិយាយទៅកាន់អ្នកសារព័ត៌មានកាលពីថ្ងៃព្រហស្បតិ៍ក្នុងទីក្រុងវ៉ាស៊ីនតោន ជាកន្លែងដែលលោកបានចូលរួមក្នុងពិធីបុណ្យសពផ្លូវរដ្ឋរបស់អតីតប្រធានាធិបតីសហរដ្ឋអាមេរិក លោក Jimmy Carter ក្នុងនាមជាបេសកជនពិសេសរបស់នាយករដ្ឋមន្ត្រីជប៉ុន។ ដោយនិយាយសំដៅទៅលើរដ្ឋាភិបាលសហរដ្ឋអាមេរិកបន្ទាប់ ក្រោមការដឹកនាំរបស់លោក Trump លោក Suga បាននិយាយថា វាមានសារៈសំខាន់ក្នុងការពង្រឹងបន្ថែមទៀតនូវសម្ព័ន្ធភាពទ្វេភាគី។

លោកនិយាយថា ដើម្បីទទួលបាននូវចំណុចនេះ លោកជឿជាក់ថា ស្ថានភាពដែលគួរអោយចង់បានបំផុតនោះគឺថា លោក Ishiba និងលោក Trump ស្ថិតក្នុងលក្ខខណ្ឌដ៏ល្អ ដែលមេដឹកនាំទាំងពីរអាចសន្ទនាគ្នាតាមទូរស័ព្ទនៅពេលណាមួយដែលសមស្រប។

កាលពីថ្ងៃមុន លោក Suga បានជួបជាមួយសមាជិកព្រឹទ្ធសភាសហរដ្ឋអាមេរិក លោក Bill Hagerty ដែលបានបម្រើការជាឯកអគ្គរដ្ឋទូតសហរដ្ឋអាមេរិកប្រចាំប្រទេសជប៉ុន ក្រោមអាណត្តិដំបូងរបស់លោក Trump ជាប្រធានាធិបតី។

អតីតនាយករដ្ឋមន្ត្រីជប៉ុន បានសង្កត់ធ្ងន់លើតម្រូវការនៃការកសាងទំនាក់ទំនងជាមួយមនុស្សជិតស្និទ្ធនឹងលោក Trump ។

លោក Trump នឹងស្បថចូលកាន់តំណែងជាប្រធានាធិបតី នៅថ្ងៃទី២០ ខែមករា ខាងមុខនេះ។