ប្រធានសន្តិសុខរបស់លោកប្រធានាធិបតីកូរ៉េខាងត្បូង Yoon Suk Yeol បានព្រមាននៅថ្ងៃសុក្រ (១០ មករា) ប្រឆាំងនឹងការប្រើប្រាស់ហិង្សាដើម្បីចាប់ខ្លួបមេដឹកនាំដែលត្រូវបានចោទប្រកាន់ទម្លាក់តំណែង និងប្រឈមមុខនឹងដីកាចាប់ខ្លួនរូបនេះ ជុំវិញការស៊ើបអង្កេតព្រហ្មទណ្ឌ ក្នុងក្រឹត្យច្បាប់អាជ្ញាសឹកកាលពីថ្ងៃទី០៣ ខែធ្នូ ដោយលើកឡើងថា លោក Yoon រងភាពអយុត្តិធម៌ ហើយសង្កត់ធ្ងន់ថា ការបង្ហូរឈាមណាមួយត្រូវតែបញ្ចៀសឱ្យផុត។

លោក Park Chong-jun ប្រធានសេវាសន្តិសុខប្រធានាធិបតី ឬហៅថា PSS ក៏កំពុងស្ថិតនៅក្រោមការស៊ើបអង្កេតសម្រាប់ការរារាំងកាតព្វកិច្ចផ្លូវការទាក់ទងនឹងការប្រឈមមុខដាក់គ្នារយៈពេល ៦ម៉ោងកាលពីសប្តាហ៍ មុនរវាងភ្នាក់ងារ PSS និងអ្នកស៊ើបអង្កេតដែលព្យាយាមអនុវត្តដីកាចាប់ខ្លួនលោក Yoon។

នៅទីស្នាក់ការនគរបាលដើម្បីសាកសួរ លោក Park ដែលជាអតីតមន្ត្រីនគរបាលជាន់ខ្ពស់ បាននិយាយថា ការប៉ុនប៉ងបច្ចុប្បន្នដើម្បីចាប់ខ្លួនប្រធានាធិបតីដែលកំពុងកាន់តំណែងគឺជារឿងខុសធ្ងន់ណាស់ ហើយលោក Yoon សមនឹងទទួលបានគាំពារ "ស័ក្ដិសម" នឹងឋានៈរបស់ប្រទេស។

គួរបញ្ចាក់ថា ភ្នាក់ងារ PSS រាប់រយនាក់បានយាមកាមបរិវេណប្រធានាធិបតី និងរារាំងអ្នកស៊ើបអង្កេតពីការព្យាយាមចាប់ខ្លួនលោក Yoon កាលពីថ្ងៃសុក្រសប្ដាហ៍មុន។ ក្រុមស៊ើបអង្កេតបង្ខំចិត្តដកថយ ដោយសារតែហានិភ័យនៃការប៉ះទង្គិចគ្នា ហើយក្រុមនេះក៏ទទួលបានដីកាចាប់ខ្លួនថ្មីមួយនៅសប្តាហ៍នេះ បន្ទាប់ពីលោក Yoon បដិសេធការកោះហៅម្តងហើយម្តងទៀតឱ្យចូលខ្លួនដើម្បីសាកសួរ៕