ព្រះវិហារនៅទីក្រុង Los Angeles សហរដ្ឋអាមេរិក មាននូវការជួបជុំគ្នាពិសេសមួយកាលពីថ្ងៃព្រហស្បតិ៍ សម្រាប់ជនរងគ្រោះដោយសារភ្លើងឆេះព្រៃ ដោយមានការចូលរួមពីក្រុមអ្នកគោរពបូជា ស្របពេលដែលភ្លើងឆេះព្រៃ ២កន្លែង បន្តឆាបឆេះដោយពុំអាចទប់ស្កាត់បាន នៅក្នុងទីក្រុងមួយនេះ។

នៅក្នុងពិធីជួបជុំគ្នានោះ គ្រូគង្វាល José Gómez មកពីព្រះវិហារ Our Lady of the Angels បានស្វាគមន៍បុព្វជិតមកពីព្រះវិហារកាតូលិក Corpus Christi ស្ថិតក្នុងតំបន់ Pacific Palisades ដែលត្រូវបានបំផ្លិចបំផ្លាញដោយសារភ្លើងឆេះព្រៃ ។

គ្រូគង្វាល Liam Kidney នៃព្រះវិហារ Corpus Christi បាននិយាយថា សហគមន៍ទាំងមូលនឹងត្រូវស្តាឡើងវិញ ។

លោក Kidney និយាយថា ដោយមានជំនួយពីព្រះជាម្ចាស់ ពួកយើងនឹងរួបរួមគ្នាក្នុងនាមជាកូនចៅរបស់ព្រះ ដើម្បីកសាងសហគមន៍របស់ពួកយើងឡើងវិញ ។

ភ្លើងឆេះព្រៃ Palisades Fire ស្ថិតនៅចន្លោះទីក្រុង Santa Monica និងទីក្រុង Malibu នៅចំហៀងខាងលិចនៃទីក្រុង Los Angeles និងភ្លើងឆេះព្រៃ Eaton Fire ស្ថិតនៅចំហៀងខាងកើតជិតទីក្រុង Pasadena ត្រូវបានគេចាត់ទុកថាជាភ្លើងឆេះព្រៃបំផ្លិចបំផ្លាញខ្លាំងបំផុតក្នុងប្រវត្តិសាស្រ្តទីក្រុង Los Angeles ដោយមកទល់នឹងពេលនេះ បានលេបត្របាក់ដីព្រៃជិត ១១.៣៣០ហិចតា និងបានធ្វើឲ្យតំបន់ជិតខាងទាំងមូល ក្លាយជាផេះផង់ ។

ក្រុមមន្រ្តី និយាយថា មនុស្សយ៉ាងហោច ៧នាក់ ត្រូវបានសម្លាប់ ហេដ្ឋារចនាសម្ព័ន្ធរាប់ពាន់កន្លែង រងការឆាបឆេះគ្មានសេសសល់ ហើយមនុស្សជិត ១៨ម៉ឺននាក់ ត្រូវបានបញ្ជាឲ្យជម្លៀសខ្លួន ខណៈមនុស្ស ២០ម៉ឺននាក់ផ្សេងទៀត ស្ថិតក្រោមការព្រមានឲ្យជម្លៀសខ្លួន ៕