នាយករដ្ឋមន្រ្តីជប៉ុនលោក Shigeru Ishiba បានធ្វើការសង្កត់ធ្ងន់ពីតម្រូវការពង្រឹងទំនាក់ទំនងជាមួយអាស៊ាន ក្រោយមានកិច្ចប្រជុំជាមួយសមភាគីម៉ាឡេស៊ីលោក Anwar Ibrahim នៅក្នុងទីក្រុង Putrajaya(បុត្រាជ័យ) នាថ្ងៃសុក្រនេះ ។

ថ្លែងនៅក្នុងសន្និសីទសារព័ត៌មានរួមគ្នា លោក Ishiba បានគូសបញ្ជាក់ពីការយកចិត្តទុកដាក់របស់ជប៉ុនលើការធ្វើឲ្យល្អប្រសើរឡើងកិច្ចសហប្រតិបត្តិការជាមួយបណ្តាប្រទេសអាស៊ាន ។

លោក Ishiba បញ្ជាក់ថា ពួកយើងចូលដល់ឆ្នាំថ្មីជាមួយនឹងភាពស្មុគស្មាញ និងភាពមិនប្រាកដប្រជាកើនឡើងខ្លាំងជាងមុន ប៉ុន្តែសម្រាប់វិស័យការទូតជប៉ុន ការពង្រឹងកិច្ចសហប្រតិបត្តិការជាមួយអាស៊ាន និងអាស៊ីអាគ្នេយ៍ ស្ថិតនៅក្នុងចំណោមអាទិភាពកំពូលរបស់ពួកយើង ។ លោកបានលើកឡើងផងដែរពីតួនាទីយ៉ាងសំខាន់របស់ម៉ាឡេស៊ី ក្នុងនាមជាប្រធានអាស៊ានបច្ចុប្បន្ន ។

មេដឹកនាំទាំង ២ បានពិភាក្សាផងដែរលើក្តីកង្វល់សន្តិសុខក្នុងតំបន់ រួមទាំងភាពតានតឹងនៅសមុទ្រចិនខាងកើត និងសមុទ្រចិនខាងត្បូង តំបន់មជ្ឈិមបូព៌ា និងវិបត្តិនៅមីយ៉ាន់ម៉ា ។

លោក Ishiba និយាយថា ពួកយើងបានឯកភាពគ្នាបន្តទំនាក់ទំនងជិតស្និតលើបញ្ហាទាំងនេះ ។

សូមបញ្ជាក់ថា លោក Ishiba ស្ថិតក្នុងដំណើរទស្សនកិច្ចរយៈពេល ៤ថ្ងៃទៅកាន់ប្រទេសម៉ាឡេស៊ី និងឥណ្ឌូនេស៊ី ដើម្បីពង្រឹងទំនាក់ទំនងទ្វេភាគីនៅក្នុងតំបន់ ។

ដំណើរទស្សនកិច្ចនេះ បានគូសបញ្ជាក់ផងដែរពីកិច្ចខិតខំប្រឹងប្រែងរបស់ជប៉ុន ដើម្បីសម្របសម្រួលជាមួយម៉ាឡេស៊ី ក្នុងការលើកកម្ពស់តំបន់ឥណ្ឌូន-ប៉ាស៊ីហ្វិកសេរី និងបើកទំលាយ ៕