ចំហេះព្រៃដែលបង្កការបំផ្លិចបំផ្លាញយ៉ាងធ្ងន់ធ្ងរ នៅតំបន់ទីក្រុង Los Angeles អាចក្លាយជាអគ្គិភ័យដែលបង្កការខាតបង់ទឹកប្រាក់ច្រើនបំផុត ក្នុងប្រវត្តិសាស្ត្រអាមេរិក។

បើយោងតាមការប៉ាន់ប្រមាណដែលចេញផ្សាយដោយក្រុមហ៊ុន JPMorgan កាលពីថ្ងៃព្រហស្បតិ៍ (ទី៩ ខែមករា) បានបង្ហាញថា ការខាតបង់ផ្នែកធានារ៉ាប់រងដោយសារអគ្គិភ័យនៅសប្តាហ៍នេះ អាចលើសពី ២០ពាន់លានដុល្លារ។ ហើយយោងតាមទិន្នន័យពីក្រុមហ៊ុន Aon បានឲ្យដឹងថា ការខាតបង់ទាំងនោះ នឹងលើសពីការខូចខាតផ្នែកធានារ៉ាប់រងចំនួន ១២,៥ពាន់លានដុល្លារ ដោយសារចំហេះព្រៃ Camp Fire ឆ្នាំ២០១៨ ដែលជាអគ្គិភ័យបង្កការខាតបង់ទឹកប្រាក់ច្រើនបំផុត ក្នុងប្រវត្តិសាស្ត្ររបស់ប្រទេសនេះ។

យោងតាមទីភ្នាក់ងាររដ្ឋាភិបាល Cal Fire បានឲ្យដឹងថា ចំហេះព្រៃចំនួន ៥ ដែលបង្កឡើងដោយលក្ខខណ្ឌអាកាសធាតុស្ងួត និងខ្យល់បក់ខ្លាំង បានឆាបឆេះផ្ទៃដី ២៩.០០០ហិកតា នៅជុំវិញតំបន់របស់ទីក្រុង Los Angeles ចាប់តាំងពីថ្ងៃអង្គារដើមសប្ដាហ៍នេះ។ អគ្គិភ័យដ៏ធំបំផុតចំនួន ២ គឺ Palisades និង Eaton នៅតែមិនអាចគ្រប់គ្រងបានទាំងស្រុងនោះឡើយ។

យោងតាមតម្រួតតំបន់ LA County បានឲ្យដឹងថា មនុស្សជិត ១៨០.០០០នាក់ នៅតែស្ថិតក្រោមការបញ្ជាជម្លៀស ហើយបានបន្ថែមថា ចំនួនអ្នកស្លាប់ដោយសារអគ្គិភ័យនេះ មិនទាន់ដឹងជាក់លាក់នៅឡើយទេ។

យោងតាមធនាគារវិនិយោគ បានឲ្យដឹងថា ការប៉ាន់ប្រមាណនៃការខាតបង់ផ្នែកសេដ្ឋកិច្ច ដោយសារចំហេះព្រៃនេះ បានកើនឡើងទ្វេដង ចាប់តាំងពីថ្ងៃពុធ (ទី៨ ខែមករា) ដោយឡើងដល់ជិត ៥០ពាន់លានដុល្លារ។ តែបើយោងតាមការព្យាករណ៍របស់ក្រុមហ៊ុន AccuWeather បានបង្ហាញថា ការខាតបង់ផ្នែកសេដ្ឋកិច្ចអាចឡើងដល់ ៥៧ពាន់លានដុល្លារ៕