ទីភ្នាក់ងារសុវត្ថិភាពអាកាសចរណ៍សហភាពអឺរ៉ុប (EASA) បានចេញការព្រមានថ្មីមួយ កាលពីថ្ងៃព្រហស្បតិ៍ (ទី៩ ខែមករា) ចំពោះក្រុមហ៊ុនអាកាសចរណ៍មិនមែនអឺរ៉ុបកុំឲ្យហោះហើរ ក្នុងដែនអាកាសរុស្ស៊ីភាគខាងលិច ដោយសារតែហានិភ័យក្នុងការក្លាយជាគោលដៅដោយអចេតនារបស់ប្រព័ន្ធការពារដែនអាកាសនៃប្រទេសនេះ។

EASA បានប្រាប់ឲ្យដឹងថា ការធ្លាក់នៃយន្តហោះរបស់ក្រុមហ៊ុនអាកាសចរណ៍ Azerbaijan Airlines កាលពីខែមុន នៅក្នុងប្រទេសកាហ្សាក់ស្ថាន បន្ទាប់ពីប្រព័ន្ធការពារដែនអាកាសរុស្ស៊ី បានបាញ់ប្រឆាំងយានដ្រូនរបស់អ៊ុយក្រែន បង្ហាញពីការមានហានិភ័យខ្ពស់។ យ៉ាងហោចណាស់មនុស្ស ៣៨នាក់ បានបាត់បង់ជីវិត នៅក្នុងហេតុការណ៍នោះ។

EASA បានលើកឡើងថា៖ «ជម្លោះដែលកំពុងបន្តមាន បន្ទាប់ពីមានការលុកលុយរបស់រុស្ស៊ីលើអ៊ុយក្រែន បង្កហានិភ័យដែលយន្តហោះស៊ីវិល ត្រូវបានក្លាយកំណត់គោលដៅដោយអចេតនា នៅក្នុងដែនអាកាសនៃសហព័ន្ធរុស្ស៊ី ដោយសារតែកង្វះការសម្របសម្រួលផ្នែកយោធាស៊ីវិល និងសក្តានុពល ចំពោះការកំណត់អត្តសញ្ញាណខុស។ នៅគ្រប់រយៈកម្ពស់ និងកម្រិតហោះហើរទាំងអស់ EASA សូមណែនាំកុំឲ្យធ្វើប្រតិបត្តិការ ក្នុងដែនអាកាសដែលរងផលប៉ះពាល់របស់សហព័ន្ធរុស្ស៊ី ដែលស្ថិតនៅភាគខាងលិចនៃរយៈបណ្តោយ ៦០ដឺក្រេភាគខាងកើត»។

ការព្រមាននេះ គឺសម្រាប់ប្រតិបត្តិករប្រទេសទី៣ ដែលត្រូវបានអនុញ្ញាតដោយ EASA ពីព្រោះដែនអាកាសរុស្ស៊ីត្រូវបានបិទមិនឲ្យមានការហោះហើរឡើយ សម្រាប់ក្រុមហ៊ុនអាកាសចរណ៍សហភាពអឺរ៉ុប ចាប់តាំងពីប្លុកនេះបានដាក់ទណ្ឌកម្មពាក់ព័ន្ធនឹងបញ្ហាសង្គ្រាមអ៊ុយក្រែន ដោយផ្តោតលើវិស័យអាកាសចរណ៍របស់រុស្ស៊ី៕