មន្រ្តីជាន់ខ្ពស់មួយរូបគាំទ្រដោយរុស្ស៊ី និយាយថា កងទ័ពអ៊ុយក្រែន បានវាយប្រហារផ្សារទំនើបមួយកន្លែងនៅថ្ងៃសុក្រនេះ ក្នុងទីក្រុង Donetskដែលកាន់កាប់ដោយរុស្ស៊ី នៅតំបន់ភាគខាងកើតអ៊ុយក្រែន នៅក្នុងការវាយប្រហារមួយដែលប្រើប្រាស់មីស៊ីលផ្គត់ផ្គង់ដោយសហរដ្ឋអាមេរិក ។

ទីភ្នាក់ងារព័ត៌មានក្នុងស្រុក Donetsk រាយការណ៍ដោយលើកឡើងប្រភពពីលោក Denis Pushilin គឺជាប្រមុខសាធារណរដ្ឋប្រជាមានិត Donetsk ដែលត្រូវបានបញ្ចូលជាឧបសម្ព័ន្ធរបស់រុស្ស៊ីនោះថា ជនស៊ីវិលម្នាក់ ត្រូវបានសម្លាប់ និងជនស៊ីវិលយ៉ាងហោច ៦នាក់ផ្សេងទៀត បានរងរបួស ។

នៅមិនទាន់មានសេចក្តីអត្ថាធិប្បាយភ្លាមៗនោះទេពីអ៊ុយក្រែន ហើយទីភ្នាក់ងារព័ត៌មានរ៉យទ័រ មិនអាចបញ្ជាក់បានភ្លាមៗនោះដែរ លើសេចក្តីរាយការណ៍មួយនេះ ។

រូបថតសន្លឹកដែលពុំបានបញ្ជាក់ផ្ទៀងផ្ទាត់បង្ហោះនៅលើបណ្តាញព័ត៌មានសង្គមឃើញ រថយន្តឆាបឆេះនៅមុខអគារកម្ពស់ ២ជាន់ ព័ទ្ធជុំវិញដោយកម្ទេចកម្ទី ។

ចំណែកឯ រូបភាពវីដេអូឃ្លីបនៅលើបណ្តាញព័ត៌មានសង្គម Dashcam បង្ហោះដោយអ្នកបើកបរម្នាក់ ឃើញពេលដែលផ្សារទំនើប Moloko រងការវាយប្រហារដោយមីស៊ីល ជាមួយនឹងការផ្ទុះដ៏ធំមួយ និងអណ្តាតភ្លើងផុសឡើងលើអាកាស ។

លោក Denis Pushilin គឺជាមន្រ្តីជាន់ខ្ពស់មួយរូបគាំទ្រដោយរុស្ស៊ី បានចោទប្រកាន់កងទ័ពអ៊ុយក្រែនថា បានបាញ់មីស៊ីល HIMARS ផ្គត់ផ្គង់ដោយសហរដ្ឋអាមេរិក ចូលទៅក្នុងតំបន់នោះ អំឡុងពេលដ៏មមាញឹកនៅព្រឹកថ្ងៃសុក្រនេះ ។

លោក Pushilin បាននិយាយនៅក្នុងសេចក្តីថ្លែងការណ៍បង្ហោះលើបណ្តាញព័ត៌មានសង្គម Telegramថា អគារផ្ទះល្វែងមួយខ្នងនៅទីក្រុង Svitlodarsk ស្ថិតក្នុងតំបន់ Donetsk រងការវាយប្រហារផងដែរដោយកងកម្លាំងអ៊ុយក្រែន បណ្តាលឲ្យស្រ្តីម្នាក់ បាត់បង់ជីវិត និងមនុស្ស ៤នាក់ផ្សេងទៀត រងរបួស ។

ទីភ្នាក់ងារព័ត៌មានរដ្ឋរុស្ស៊ី TASS រាយការណ៍ថា អគារផ្សេងទៀត និងរថយន្តប្រហែល ១៥គ្រឿង រងការខូចខាតនៅក្នុងការវាយប្រហារតែមួយ ៕