ប្រធានសន្តិសុខប្រធានាធិបតីកូរ៉េខាងត្បូងលោក Park Jong-joon បានលាលែងពីតំណែង ក្រោយរូបលោកព្រមានក្រុមអាជ្ញាធរឲ្យចៀសផុតពីការបង្ហូរឈាមគ្នា នៅក្នុងការប៉ុនប៉ងណាមួយដើម្បីចាប់ខ្លួនលោកប្រធានាធិបតីរងការចោតប្រកាន់ Yoon Suk Yeol ជុំវិញការប្រកាសច្បាប់អាជ្ញាសឹករយៈពេលខ្លី ។

លោក Park បានព្រមាននៅថ្ងៃសុក្រនេះប្រឆាំងនឹងការប្រើប្រាស់អំពើហិង្សា ដើម្បីចាប់ខ្លួបមេដឹកនាំដែលត្រូវបានចោទប្រកាន់ទម្លាក់តំណែង និងប្រឈមមុខនឹងដីកាចាប់ខ្លួនរូបនេះ ជុំវិញការស៊ើបអង្កេតព្រហ្មទណ្ឌ ក្នុងក្រឹត្យច្បាប់អាជ្ញាសឹកកាលពីថ្ងៃទី០៣ ខែធ្នូ ដោយលើកឡើងថា លោក Yoon រងភាពអយុត្តិធម៌ ដោយលោកសង្កត់ធ្ងន់ថា ការបង្ហូរឈាមណាមួយត្រូវតែបញ្ចៀសឲ្យផុត ។

លោក Park បានលាលែងពីតំណែងនៅថ្ងៃសុក្រនេះ ស្របពេលការស៊ើបអង្កេតចំពោះការចោទប្រកាន់ថា រូបលោកបានរារាំងកាតព្វកិច្ចមន្រ្តីរដ្ឋការ ។

ការិយាល័យប្រធានាធិបតីស្តីទីកូរ៉េខាងត្បូងលោក Choi Sang-mok បានបញ្ជាក់ថា ពួកគេទទួលយកការលាលែងពីតំណែងរបស់លោក Park ក្រោយរូបលោកបង្ហាញខ្លួនសម្រាប់ការសាកសួររបស់នគរបាលនៅពេលមុននេះ ។

ថ្លែងពេលលោកមកដល់សម្រាប់ការសាកសួររបស់នគរបាល លោក Park និយាយថា ពលរដ្ឋជាច្រើនមានការព្រួយបារម្ភចំពោះលទ្ធភាពនៃអំពើហិង្សា បើសិនជាក្រុមអ្នកស៊ើបអង្កេតព្យាយាមអនុវត្តដីការចាប់ខ្លួនមួយទៀត លើលោក Yoon ។ លោកថា ការប៉ុនប៉ងបច្ចុប្បន្ន ដើម្បីចាប់ខ្លួនប្រធានាធិបតីដែលកំពុងកាន់តំណែងគឺជារឿងខុសធ្ងន់ណាស់ ហើយលោក Yoon សមនឹងទទួលបានគាំពារស័ក្ដិសម នឹងឋានៈរបស់ប្រទេស ។

លោក Park និយាយប្រាប់ក្រុមអ្នកសារព័ត៌មាននៅទីស្នាក់ការកណ្តាលស៊ើបអង្កេតចម្រុះ ស្ថិតក្នុងទីក្រុងសេអ៊ូលថា លោកមកទីនេះនៅថ្ងៃនេះ ដោយមានជំនឿថា មិនថានៅក្នុងកាលៈទេសៈបែបណាទេ គួរតែគ្មានការប៉ះទង្គិចរាងកាយនោះឡើយ ឬការបង្ហូរឈាមគ្នាជាដាច់ខាត ហើយលោកគ្រាន់តែសង្ឃឹមថានឹងអាចការពារឧបទ្ទេវហេតុមួយនេះពីការកើតឡើង ៕