យោងតាមក្រុមមន្ត្រី និងអ្នកវិភាគ បានឲ្យដឹងថា អង្គការសន្ធិសញ្ញាអាត្លង់ទិកខាងជើង ឬអង្គការណាតូ (NATO) នឹងមិនស្តាប់តាមសំណើរបស់លោក Donald Trump ដែលចង់ឲ្យដំឡើងការចំណាយលើវិស័យការពារជាតិនោះទេ ប៉ុន្តែទំនងជានឹងព្រមព្រៀងឲ្យមានកម្រិតលើសពីគោលដៅបច្ចុប្បន្នរបស់ខ្លួន។

លោកប្រធានាធិបតីជាប់ឆ្នោតអាមេរិក កាលពីថ្ងៃអង្គារដើមសប្ដាហ៍នេះ បានប្រកាសថា សមាជិកនៃសម្ព័ន្ធភាពយោធាមួយនេះ គួរតែចំណាយ ៥ភាគរយនៃផលិតផលក្នុងស្រុកសរុប (GDP) លើវិស័យការពារជាតិ ដែលជាការដំឡើងលើសខ្ពស់ខ្លាំងពីគោលដៅ ២ភាគរយ នាពេលបច្ចុប្បន្ន និងជាកម្រិតមួយដែលគ្មានប្រទេសរបស់អង្គការណាតូ ក្នុងនោះរួមទាំងសហរដ្ឋអាមេរិកផងដែរ ឈានដល់នោះឡើយ នាពេលនេះ។

បណ្ដាមន្ត្រីមកពីប្រទេសអង្គការណាតូ បានលើកឡើងថា ពួកគេបានយល់ស្របថា ការចំណាយលើវិស័យការពារជាតិត្រូវដំឡើងបន្ថែមទៀត ប៉ុន្តែមិនគាំទ្រតួលេខ ៥ភាគរយនោះទេ ដែលអ្នកវិភាគ បាននិយាយថា នឹងមិនអាចទៅរួចនោះឡើយ ទាំងផ្នែកខាងនយោបាយ និងសេដ្ឋកិច្ច សម្រាប់សមាជិកស្ទើរតែទាំងអស់។ កម្រិតនោះនឹងត្រូវការប្រាក់រាប់រយពាន់លានដុល្លារ ក្នុងការផ្តល់មូលនិធិបន្ថែម។

តែទោះបីជាយ៉ាងណាក្ដី គោលដៅថ្មីមួយ ទំនងជាមានការព្រមព្រៀងគ្នា នៅក្នុងកិច្ចប្រជុំកំពូលរបស់អង្គការណាតូ នៅទីក្រុងឡាអេ ប្រទេសហូឡង់ ក្នុងខែមិថុនា ដែលត្រូវបានជំរុញដោយការភ័យខ្លាចថា រុស្ស៊ីអាចនឹងវាយប្រហារប្រទេសណាតូណាមួយទៀតបន្ទាប់ពីអ៊ុយក្រែន និងដោយការទាមទាររបស់លោក Trump។

អ្នកខ្លះរំពឹងថា បន្ទាប់ពីមានការជជែកតវ៉ាគ្នាយ៉ាងច្រើន សមាជិក ៣២ប្រទេសរបស់អង្គការណាតូ នឹងព្រមព្រៀងគ្នា ដើម្បីឈានគោលដៅប្រហែល ៣ភាគរយនៃផលិតផលក្នុងស្រុកសរុប៕