ប្រជាពលរដ្ឋសហរដ្ឋអាមេរិក បានភិតភ័យរួចទៅហើយ ពេលដែលភ្លើងឆេះព្រៃកាន់តែច្រើនឆាបឆេះនៅទូទាំងតំបន់ Los Angeles ធ្វើឲ្យមនុស្សរាប់លានមានការព្រួយបារម្ភជាខ្លាំង ក្រោយភ្លើងឆេះព្រៃរយៈពេល ៤ថ្ងៃ ពុំឃើញមានភាពធូរស្បើយនោះ ។

រឿងដ៏គួរភ្ញាក់ផ្អើលមួយទៀត បានកើតឡើងកាលពីរសៀលថ្ងៃព្រហស្បតិ៍ ពេលដែលសារជូនដំណឹងប្រកាសអាសន្នបានលោតក្នុងទូរស័ព្ទដៃ និងធ្វើឲ្យពលរដ្ឋអាមេរិកមានការភិតភ័យយ៉ាងខ្លាំង ។

សារមួយនេះ គឺផ្ញើរមានកំហុសឆ្គងដល់រាល់ទូរស័ព្ទដៃនៅក្នុងស្រុក Los Angeles ជាទីដែលមានមនុស្សរស់នៅប្រហែល ១០លាននាក់ ព្រមានពួកគេថា ភ្លើងឆេះព្រៃខិតមកជិតហើយៗពួកគេគួរតែត្រៀមខ្លួនជម្លៀសខ្លួនចេញ ។

នាង Rebecca Alvarez-Petit កំពុងនិយាយទូរស័ព្ទការងារតាមវីដេអូ ពេលដែលទូរស័ព្ទរបស់នាង ចាប់ផ្តើមលោតសារប្រកាសអាសន្ន ។

សារអក្សរនោះសរសេរថា “ការព្រមានពីការជម្លៀសខ្លួន ត្រូវបានចេញនៅក្នុងតំបន់របស់អ្នក” ។ សំឡេងទូរស័ព្ទនៅតែបន្លឺឡើង ជុំវិញវិញនាង ពេលដែលសហការីបស់នាង ទទួលបានសំឡេងសារតែមួយ ។

នាង Rebecca និយាយថា វាហាក់ដូចជាមានការភ័យខ្លាចខ្លាំងណាស់ពេលដែលខ្ញុំឃើញសារបែបហ្នឹង ។ នាង និងសហការីរបស់នាង បានព្យាយាមស្វែងរកមើលគ្រោះថ្នាក់ជិតមកដល់ ។

សូមបញ្ជាក់ថា ចំនួនមនុស្សស្លាប់ ដោយសារភ្លើងឆេះព្រៃនេះ បានកើនឡើងពី ៧នាក់ ដល់ ១០នាក់ហើយ ខណៈគេរំពឹងថា ចំនួនគ្រោះថ្នាក់នឹងបន្តកើនឡើងបន្ថែមទៀត ៕