ទីក្រុងគីវ និងប្រ៊ុចសែល នៅថ្ងៃសុក្រ (ទី១០ ខែមករា) នេះ បានប្រាប់ឲ្យដឹងថា ប្រទេសអ៊ុយក្រែនបានទទួលចំណែកដំបូងចំនួន ៣ពាន់លានអឺរ៉ូ (៣,០៩ពាន់លានដុល្លារ) នៃប្រាក់កម្ចីរបស់សហភាពអឺរ៉ុប (EU) ដែលយល់ព្រមដោយសមាជិកនៃក្រុមប្រទេសប្រជាធិបតេយ្យធំៗទាំង៧ (G7) និងដែលគាំទ្រដោយប្រាក់ចំណូលពីទ្រព្យសម្បត្តិអធិបតេយ្យរបស់រុស្ស៊ីដែលត្រូវបានបង្កក។

គួររំលឹកថា បណ្ដាមេដឹកនាំ G7 កាលពីខែតុលាឆ្នាំមុន បានយល់ព្រមផ្តល់ប្រាក់កម្ចីចំនួន ៥០ពាន់លានដុល្លារដល់អ៊ុយក្រែនតាមរយៈបណ្ដាញជាច្រើន។

តាមរយៈបណ្តាញសង្គម X ប្រធានគណៈកម្មការអឺរ៉ុប លោកស្រី Ursula von der Leyen បានឲ្យដឹងថា៖ «ថ្ងៃនេះ យើងផ្តល់ប្រាក់ចំនួន ៣ពាន់លានអឺរ៉ូដល់អ៊ុយក្រែន ដែលជាការទូទាត់លើកទី១ នៃផ្នែកសហភាពអឺរ៉ុបនៃប្រាក់កម្ចីរបស់ G7»។ 

ចំណែកនាយករដ្ឋមន្រ្តីអ៊ុយក្រែន លោក Denys Shmyhal បានបញ្ជាក់ពីការផ្ទេរមូលនិធិនេះក្នុងសេចក្តីថ្លែងការណ៍មួយ នៅលើកម្មវិធីផ្ញើសារ Telegram។

បណ្តាញផ្តល់មូលនិធិដែលត្រូវបានយល់ព្រមដោយ G7 រួមមានកម្ចីជំនួយម៉ាក្រូហិរញ្ញវត្ថុពី EU គណនីគ្រប់គ្រងពហុម្ចាស់ជំនួយរបស់មូលនិធិរូបិយវត្ថុអន្តរជាតិ (IMF) សម្រាប់អ៊ុយក្រែន និងមូលនិធិអន្តរការីហិរញ្ញវត្ថុដែលទើបបង្កើតថ្មី សម្រាប់អ៊ុយក្រែន នៅធនាគារពិភពលោក៕