តុលាការវៀតណាមបានកាត់ទោសអតីតមេធាវីដ៏លេចធ្លោម្នាក់ឲ្យជាប់ពន្ធនាគាររយៈពេល ៣ឆ្នាំ នៅថ្ងៃសុក្រ (ទី១០ ខែមករា) នេះ ពាក់ព័ន្ធទៅនឹងការបង្ហោះ នៅលើបណ្ដាញសង្គម Facebook ជាសាលក្រមដែលត្រូវបានថ្កោលទោសដោយក្រុមសិទ្ធិមនុស្សថា ជាការវាយប្រហារថ្មីលើសេរីភាពនៃការបញ្ចេញមតិ នៅក្នុងប្រទេសកុម្មុយនីស្តមួយនេះ។

លោក Tran Dinh Trien អតីតអនុប្រធានសមាគមគណៈមេធាវីទីក្រុងហាណូយ គឺជាមេធាវីដ៏ល្បីល្បាញម្នាក់ចុងក្រោយបង្អស់ដែលត្រូវបានអាជ្ញាធរកំណត់គោលដៅ ចំពោះអ្វីដែលពួកគេបានសរសេរតាមអ៊ីនធឺណិត។

ក្រុមអ្នកធ្វើយុទ្ធនាការសិទ្ធិមនុស្ស លើកឡើងថា រដ្ឋាភិបាលវៀតណាម ដែលប្រកាន់របបគ្រប់គ្រងផ្តាច់ការ និងឯកបក្ស ក្នុងរយៈពេលប៉ុន្មានឆ្នាំចុងក្រោយនេះ បានបង្កើនការបង្រ្កាបលើសង្គមស៊ីវិល និងបានប្រើប្រាស់ច្បាប់ ដើម្បីបំបិទមាត់អ្នករិះគន់។

តុលាការនៅទីក្រុងហាណូយ បានកាត់ទោសលោក Trien វ័យ ៦៥ឆ្នាំ ដោយចោទប្រកាន់ពីបទ «រំលោភលើសេរីភាពប្រជាធិបតេយ្យ ដើម្បីបំផ្លាញផលប្រយោជន៍រដ្ឋ» ហើយបានកាត់ទោសលោកឲ្យជាប់គុក ៣ឆ្នាំ។

តុលាការបានលើកឡើងថា អ្នកទោសរូបនេះបានសរសេរបង្ហោះនៅលើទំព័រ Facebook ផ្ទាល់ខ្លួនរបស់គេដែលមាន «ខ្លឹមសារមិនមានការផ្ទៀងផ្ទាត់ត្រឹមត្រូវ» ជាការរៀបរាប់ដែល «ប៉ះពាល់ដល់កេរ្តិ៍ឈ្មោះរបស់តុលាការ និងប្រធានចៅក្រមនៃតុលាការកំពូលដោយផ្ទាល់»។

លោក Trien ប្រធានក្រុមហ៊ុនច្បាប់ Vi Dan «ដើម្បីប្រជាជន» នៅទីក្រុងហាណូយ ត្រូវបានចាប់ខ្លួនកាលពីខែមិថុនា។ អាជ្ញាប័ណ្ណស្របច្បាប់របស់លោក ត្រូវបានព្យួរកាលពីសប្តាហ៍មុន៕