រដ្ឋបាលរបស់លោកប្រធានាធិបតី Joe Biden កាលពីថ្ងៃសុក្រ បានបន្តការអនុគ្រោះការនិរទេសដែលបច្ចុប្បន្នគ្របដណ្តប់លើជនអន្តោប្រវេសន៍៩០០.០០០នាក់ មកពីប្រទេសវេណេស៊ុយអេឡា អែលសាល់វ៉ាឌ័រ អ៊ុយក្រែន និងប្រទេសស៊ូដង់ ជាចំណាត់ការដែលនឹងពន្យារពេលការប៉ុនប៉ងណាមួយរបស់ប្រធានាធិបតីជាប់ឆ្នោត លោក Donald Trump ដើម្បីដកការការពារទាំងនោះ។

ក្រសួងសន្តិសុខមាតុភូមិរបស់សហរដ្ឋអាមេរិក (DHS) បានបន្ថែមការចុះឈ្មោះក្នុងកម្មវិធីស្ថានភាពការពារបណ្តោះអាសន្ន (TPS) សម្រាប់ពលរដ្ឋទាំងនោះ ដោយផ្តល់ឱ្យជនអន្តោប្រវេសន៍នូវការពន្យាពេលការនិរទេស និងការទទួលបានការអនុញ្ញាតការងារសម្រាប់រយៈពេល១៨ខែ បន្ថែមទៀត។

លោក Biden ដែលជាអ្នកប្រជាធិបតេយ្យ បានបង្កើនចំនួនជនអន្តោប្រវេសន៍ដែលមានសិទ្ធិទទួលបានសម្រាប់កម្មវិធីស្ថានភាពការពារបណ្តោះអាសន្ន (TPS) ចាប់តាំងពីលោកចូលកាន់តំណែងក្នុងឆ្នាំ២០២១។ ស្ថានភាពដែលផ្តល់ឲ្យ គឺសម្រាប់ប្រជាជនមកប្រទេសកំណើតរបស់ពួកគេ ជាអ្នកដែលជួបប្រទះគ្រោះមហន្តរាយធម្មជាតិ ជម្លោះប្រដាប់អាវុធ ឬព្រឹត្តិការណ៍ផ្សេងៗ ខណៈបច្ចុប្បន្ននេះមានជាង ១លាននាក់ មកពី១៧ប្រទេស។

លោក Trump មកពីគណបក្សសាធារណរដ្ឋ ដែលនឹងត្រឡប់ទៅកាន់តំណែងសេតវិមានវិញ នៅថ្ងៃទី២០ ខែមករា បានព្យាយាមបញ្ចប់ការចុះឈ្មោះសម្រាប់កម្មវិធីស្ថានភាពការពារបណ្តោះអាសន្ន (TPS) ភាគច្រើនក្នុងអំឡុងពេលអាណត្តិឆ្នាំ ២០១៧-២០២១ របស់លោក ប៉ុន្តែត្រូវបានរារាំងដោយតុលាការសហរដ្ឋអាមេរិក។ 

លោក Trump បានទទួលជ័យជម្នះអាណត្តិមួយទៀតនៅក្នុងតំណែង ដោយសន្យាថានឹងមានការបង្រ្កាបជនអន្តោប្រវេសន៍ទ្រង់ទ្រាយធំ ហើយជាថ្មីម្តងទៀតត្រូវបានគេរំពឹងថានឹងព្យាយាមបញ្ចប់កម្មវិធីស្ថានភាពការពារបណ្តោះអាសន្ន (TPS) ។