មេដឹកនាំស្តីទីរបស់ប្រទេសកូរ៉េខាងត្បូង កាលពីថ្ងៃសុក្រ បានទទួលយកការលាលែងពីតំណែងប្រធានអង្គភាពសេវាសន្តិសុខប្រធានាធិបតី លោក Park Jong-joon ខណៈលោកប្រឈមទៅនឹងការសាកសួររបស់នគរបាលអំពីរបៀបដែលកងកម្លាំងរបស់លោក រារាំងកិច្ចខិតខំប្រឹងប្រែងអនុវត្តច្បាប់ដើម្បីចាប់ខ្លួនប្រធានាធិបតី លោក Yoon Suk Yeol ដែលត្រូវបានចោទប្រកាន់ទម្លាក់តំណែង កាលពីសប្តាហ៍មុន។

មេដឹកនាំស្តីទី ឧបនាយករដ្ឋមន្ត្រី លោក ជែ សាងម៉ុក(Choi Sang-mok) បានសម្តែងការសោកស្តាយចំពោះការប៉ះទង្គិចគ្នារវាងមន្ត្រីអនុវត្តច្បាប់ និងកងសន្តិសុខប្រធានាធិបតី និងបានអំពាវនាវឱ្យសមាជិកសភា ឈានដល់កិច្ចព្រមព្រៀង ដើម្បីបើកការស៊ើបអង្កេតឯករាជ្យមួយ។

ការិយាល័យស៊ើបអង្កេតអំពើពុករលួយសម្រាប់មន្ត្រីនិងនគរបាលជាន់ខ្ពស់ កំពុងរៀបចំផែនការប៉ុនប៉ងជាលើកទីពីរដើម្បីនាំយក លោក Yoon ទៅមន្ទីរឃុំឃាំង ខណៈពួកគេរួមគ្នាស៊ើបអង្កេតថាតើការប្រកាសច្បាប់អាជ្ញាសឹករយៈពេលខ្លីរបស់លោក កាលពីថ្ងៃទី៣ ខែធ្នូ មានការប៉ុនប៉ងបះបោរ ដែរឬយ៉ាងណា។

អង្គភាពសេវាសន្តិសុខប្រធានាធិបតី បានរារាំងការប៉ុនប៉ងដំបូងដើម្បីចាប់ខ្លួន លោកYoon នៅឯលំនៅឋានផ្លូវការរបស់លោក ដែលលោកពុំបានចាកចេញរយៈពេលជាច្រើនសប្តាហ៍មកហើយ។

វានៅពុំច្បាស់ភ្លាមៗនោះទេ ថាតើការលាលែងពីតំណែងរបស់ លោក Park Jong-joon និងការអំពាវនាវរបស់ លោក ជែ សាងម៉ុក(Choi Sang-mok) ឱ្យមានការស៊ើបអង្កេតឯករាជ្យដើម្បីគ្រប់គ្រងការស៊ើបអង្កេតលើ Yoon នឹងប៉ះពាល់ដល់ការជំរុញឱ្យនាំយក លោក Yoon ទៅកាន់មន្ទីរឃុំឃាំង ឬយ៉ាងណា នោះទេ។