យោធារុស្ស៊ីបានប្រកាសកាលពីថ្ងៃសុក្រថា យានដ្រូនរបស់ខ្លួន បានបើកការវាយប្រហារលើគោលដៅយោធាអ៊ុយក្រែនជាច្រើន ក្នុងសប្តាហ៍មុន ខណៈដែលអ៊ុយក្រែន បាននិយាយថា កងកម្លាំងរបស់ខ្លួន បានវាយប្រហារលើយានដ្រូនរបស់រុស្ស៊ី នៅតំបន់ Rostov នៃប្រទេសរុស្ស៊ីកាលពីថ្ងៃសុក្រ។

យោងតាមក្រសួងការពារជាតិរុស្ស៊ីបានឲ្យដឹងថា ចាប់ពីថ្ងៃទី ០៤ ដល់ថ្ងៃទី ១០ ខែមករា កងកម្លាំងរុស្ស៊ីបានធ្វើការវាយប្រហារយ៉ាងជាក់លាក់ចំនួន ២៨លើក ដោយប្រើប្រាស់អាវុធវាយប្រហារគោលដៅជាក់លាក់កម្រិតខ្ពស់ និងយានដ្រូនវាយប្រហារ ដោយបានបំផ្លាញហេដ្ឋារចនាសម្ព័ន្ធអាកាសយានដ្ឋានយោធាអ៊ុយក្រែន ឃ្លាំងផ្ទុកគ្រាប់រំសេវ រោងជាងដំឡើងយានដ្រូន និងកន្លែងស្តុកទុក ក៏ដូចជាចំណុចដាក់ពង្រាយបណ្តោះអាសន្នសម្រាប់កងទ័ពអ៊ុយក្រែន និងទាហានស៊ីឈ្នួលបរទេស។

កងកម្លាំងរុស្ស៊ី ក៏បានគ្រប់គ្រងកន្លែងតាំងទីលំនៅចំនួនបី រួមទាំងទីក្រុង Kurakhove ផងដែរ។

លើសពីនេះទៅទៀត ប្រព័ន្ធការពារដែនអាកាសរុស្ស៊ី បានស្ទាក់ចាប់មីស៊ីលប្រព័ន្ធមីស៊ីលតាក់ទិចកងទ័ព (ATACMS) ដែលផលិតដោយសហរដ្ឋអាមេរិកចំនួន៨ និងគ្រាប់រ៉ូកែត HIMARS ចំនួន ៤១ គ្រាប់ និងបានបាញ់ទម្លាក់យានដ្រូនចំនួន ៦៨៩ គ្រឿង និងយន្តហោះចម្បាំង MiG-29 មួយគ្រឿង។

ទន្ទឹមនឹងនេះ អគ្គសេនាធិការនៃកងកម្លាំងប្រដាប់អាវុធអ៊ុយក្រែន បានរាយការណ៍ពីការប៉ះទង្គិចគ្នាចំនួន ១៦៦ លើក គិតត្រឹមរសៀលថ្ងៃសុក្រ ដោយបាននិយាយថា កងកម្លាំងអ៊ុយក្រែន បានវាយបកដោយជោគជ័យទៅលើការវាយលុករបស់រុស្ស៊ីចំនួន ១០លើក នៅតំបន់ឃើស (Kursk)។