ប្រធានអាជ្ញាធរប៉ាឡេស្ទីន លោក ម៉ាខ្មូដ អាបាស (Mahmoud Abbas) បានសន្ទនាតាមទូរស័ព្ទ ជាមួយប្រធានាធិបតីលីបង់ លោក Joseph Aoun កាលពីថ្ងៃសុក្រ ដើម្បីពិភាក្សាអំពីស្ថានភាពជនភៀសខ្លួនប៉ាឡេស្ទីន នៅក្នុងប្រទេសលីបង់។

ទីភ្នាក់ងារសារព័ត៌មានប៉ាឡេស្ទីន WAFA បានរាយការណ៍ថា លោក អាបាស បានអបអរសាទរដល់លោក Aoun ចំពោះជ័យជម្នះរបស់គាត់ នៅក្នុងការបោះឆ្នោតប្រធានាធិបតីលីបង់។

ក្នុងអំឡុងការសន្ទនាតាមទូរស័ព្ទនេះ លោក អាបាស បានបញ្ជាក់ជាថ្មីនូវការគាំទ្ររបស់ប៉ាឡេស្ទីន ចំពោះសុន្ទរកថារបស់លោក Aoun នៅសភាលីបង់ ក្រោយការបោះឆ្នោត ជាពិសេសទាក់ទងនឹងបញ្ហាប៉ាឡេស្ទីន និងស្ថានភាពជនភៀសខ្លួនប៉ាឡេស្ទីន នៅក្នុងប្រទេសលីបង់។

លោក អាបាស បានសង្កត់ធ្ងន់លើតម្រូវការ ដើម្បី «ផ្តល់ជីវិតដ៏ថ្លៃថ្នូរសម្រាប់ជនភៀសខ្លួន នៅក្រោមច្បាប់លីបង់ រហូតដល់ពួកគេអាចត្រឡប់ទៅស្រុកកំណើតរបស់ពួកគេវិញ បន្ទាប់ពីការបង្កើតរដ្ឋប៉ាឡេស្ទីនឯករាជ្យរបស់យើង ជាមួយនឹងទីក្រុងហ្ស៊េរុយសាឡឹមខាងកើតជារដ្ឋធានីរបស់ខ្លួន និងកិច្ចសហប្រតិបត្តិការប្រកបដោយផ្លែផ្កា» ជាមួយប្រទេសលីបង់។

យោងតាមរបាយការណ៍ដែលចេញផ្សាយដោយទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់ដើមបូព៌ា (UNRWA)បានឲ្យដឹងថា ចំនួនជនភៀសខ្លួនប៉ាឡេស្ទីន នៅក្នុងប្រទេសលីបង់ បានកើនឡើងដល់ ៤៩៣.២០១នាក់ នៅឆ្នាំ ២០២៣។