នគរបាលអាហ្វ្រិកខាងត្បូង បាននិយាយកាលពីថ្ងៃសុក្រថា ពួកគេបានជួយសង្គ្រោះជនជាតិអេត្យូពីគ្មានឯកសារចំនួន ២៦នាក់ ដែលកំពុងត្រូវបានឃុំខ្លួន នៅក្នុងផ្ទះមួយនៅជាយក្រុង ក្នុងទីក្រុង Johannesburg ដោយជនសង្ស័យជួញដូរមនុស្ស។

អង្គភាពឧក្រិដ្ឋកម្មអាទិភាពរបស់នគរបាល បាននិយាយថា បុរសរហូតដល់ ៣០នាក់ផ្សេងទៀត ប្រហែលជាបានរត់គេចខ្លួនរួចហើយតាមបង្អួចដែលវាយកម្ទេច មុនពេលនគរបាល បានចូលមកដល់ផ្ទះនោះ កាលពីល្ងាចថ្ងៃព្រហស្បតិ៍ ហើយអាចលាក់ខ្លួន នៅក្នុងតំបន់នេះ។ 

លោកវរសេនីយ៍ឯក Philani Nkwalase បានបញ្ជាក់ថា យោងតាមព័ត៌មានបឋមពីក្រុមបុរសដែលត្រូវបានជួយសង្គ្រោះ ក្រុមនេះ ត្រូវបានចាប់ នៅជាយក្រុង Sandringham នៅភាគខាងជើងទីក្រុង Johannesburg ដោយគ្មានសម្លៀកបំពាក់ ឬឯកសារជាប់មកជាមួយឡើយ។

បុរសចំនួន ១១នាក់ ត្រូវបានបញ្ជូនទៅកាន់មន្ទីរពេទ្យ ដោយរបួសដែលបានបង្កឡើង នៅពេលដែលពួកគេព្យាយាមរត់គេច រួមទាំងការមុតយ៉ាងជ្រៅៗផងដែរ។

ជនជាតិអេត្យូពីបីនាក់ផ្សេងទៀត ត្រូវបានចាប់ខ្លួន ដោយសង្ស័យពីបទជួញដូរមនុស្ស។