ប្រធានាធិបតីអ៊ុយក្រែនលោក Volodymyr Zelenskiy និយាយថា កងកម្លាំងរបស់លោកចាប់បានទាហានកូរ៉េខាងជើង ២នាក់ នៅតំបន់ Kursk របស់រុស្ស៊ី គឺជាករណីលើកដំបូងដែលអ៊ុយក្រែនប្រកាសចាប់ខ្លួនបានទាំងរស់ទាហានកូរ៉េខាងជើង ចាប់តាំងពីការចូលរួមធ្វើសង្រ្គាមរបស់ពួកគេ កាលពីខែតុលាកន្លងទៅ ។

យោងតាមការអះអាងរបស់ទីក្រុងគីវ និងសម្ព័ន្ធមិត្តលោកខាងលិច បានឲ្យដឹងថា ទាហានកូរ៉េខាងជើង បានចូលរួមធ្វើសង្រ្គាមឲ្យរុស្ស៊ី កាលពីខែតុលា ឆ្នាំ ២០២៤ ដែលការប៉ានស្មានដំបូងរបស់ពួកគេថាមានទាហានកូរ៉េខាងជើងប្រហែល ១ម៉ឺននាក់ ឬអាចមានចំនួនច្រើនជាងនេះ ។

រូបភាពវីដេអូឃ្លីបបង្ហោះដោយសេវាកម្មសន្តិសុខអ៊ុយក្រែន(SBU) ឃើញ ទាហានកូរ៉េខាងជើង ២នាក់ ដែលត្រូវបានចាប់ខ្លួន ។ ទាហានម្នាក់ឃើញមានបង់រុំថ្គាម ដោយសាររងរបួស និងម្នាក់ទៀត បឺតទឹក ។ ទីតាំង និងកាលបរិច្ឆេតនៅក្នុងវីដេអូ ពុំអាចបញ្ជាក់ផ្ទៀងផ្ទាត់បានឡើយ ។

គ្រូពេទ្យម្នាក់ ធ្វើបទសម្ភាសន៍នៅក្នុងវីដេអូរបស់ SBU ដែលមិនបានបង្ហាញឈ្មោះ និងបិទមុខព្រាលៗ និយាយថា ទាហានម្នាក់ក្នុងចំណោមទាហានទាំង ២ មានរបួសមុខ ហើយនិងត្រូវព្យាបាលដោយទន្តពេទ្យ ខណៈដែលទាហានម្នាក់ទៀត បាក់ជើង ។

សេវាកម្ម SBU និយាយថា ទាហានកូរ៉េខាងជើងទាំង ២នាក់នេះ ត្រូវបញ្ជូនមកកាន់ទីក្រុងគីវ សម្រាប់ការសាកសួរ ហើយដោយសារតែពួកគេមិនចេះនិយាយភាសាអ៊ុយក្រែន រុស្ស៊ី ឬអង់គ្លេស ការសាកសួររបស់ពួកគេ នឹងត្រូវធ្វើឡើងជាភាសាកូរ៉េ ដោយមានជំនួយពីទីភ្នាក់ងារចាកម្ម NIS របស់កូរ៉េខាងត្បូង ៕