សេវាស៊ើបការណ៍សម្ងាត់ជាតិរបស់កូរ៉េខាងត្បូង នៅថ្ងៃអាទិត្យ (ទី១២ ខែមករា) បានគាំទ្រដល់របាយការណ៍របស់អ៊ុយក្រែនដែលបានអះអាងពីការចាប់ខ្លួនទាហានកូរ៉េខាងជើងដែលរងរបួស ២នាក់ ក្នុងសប្តាហ៍នេះ នៅក្នុងប្រទេសរុស្ស៊ី បន្ទាប់ពីទីក្រុងគីវ បាននិយាយថា ពួកគេកំពុងត្រូវបានសាកសួរ។

គួររំលឹកថា អ៊ុយក្រែន សហរដ្ឋអាមេរិក និងកូរ៉េខាងត្បូង បានចោទប្រកាន់កូរ៉េខាងជើងដែលប្រដាប់ដោយអាវុធនុយក្លេអ៊ែរថា បានបញ្ជូនទាហានជាង ១០.០០០នាក់ ដើម្បីទៅជួយពង្រឹងកងកម្លាំងរុស្ស៊ី។

សេវាស៊ើបការណ៍សម្ងាត់ជាតិរបស់ទីក្រុងសេអ៊ូល (NIS) បានឲ្យដឹងនៅក្នុងសេចក្តីថ្លែងការណ៍ថា ខ្លួនបាន «បញ្ជាក់ថា យោធាអ៊ុយក្រែនបានចាប់ទាហានកូរ៉េខាងជើង ២នាក់ កាលពីថ្ងៃទី៩ ខែមករា ក្នុងសមរភូមិ នៅឯតំបន់ Kursk របស់ប្រទេសរុស្ស៊ី»។

កាលពីថ្ងៃទី១១ ខែមករា សេវាស៊ើបការណ៍សម្ងាត់ SBU របស់អ៊ុយក្រែន បានចេញផ្សាយវីដេអូដែលបង្ហាញពីបុរស ២នាក់ នៅក្នុងបន្ទប់មន្ទីរពេទ្យ ដោយម្នាក់មានបង់រុំដៃ និងម្នាក់ទៀតមានបង់រុំថ្គាម។ ហើយគ្រូពេទ្យនៅមន្ទីរឃុំឃាំង បានប្រាប់ថា បុរសទី១ ក៏បានរងរបួសបាក់ជើងផងដែរ។

SBU បានឲ្យដឹងថា បុរសទាំង ២រូបនោះ បានប្រាប់អ្នកសួរចម្លើយថា ពួកគេជាទាហានទាហានដែលមានបទពិសោធន៍ ហើយម្នាក់បាននិយាយថា រូបគេត្រូវបានបញ្ជូនទៅប្រទេសរុស្ស៊ី ដើម្បីហ្វឹកហាត់ មិនមែនដើម្បីប្រយុទ្ធនោះទេ។

ប៉ុន្តែទីក្រុងគីវ មិនបានបង្ហាញភស្តុតាងដោយផ្ទាល់ថា បុរសដែលត្រូវបានចាប់ខ្លួន គឺជាជនជាតិកូរ៉េខាងជើងនោះឡើយ ហើយសារព័ត៌មាន AFP មិនអាចផ្ទៀងផ្ទាត់សញ្ជាតិរបស់ពួកគេដោយឯករាជ្យបាននោះដែរ។ ការបញ្ជាក់របស់កូរ៉េខាងត្បូង បានបន្ថែមទម្ងន់ដល់របាតការណ៍របស់ទីក្រុងគីវ។

NIS បានប្រាប់ថា ខ្លួននឹងបន្តធ្វើការជាមួយ SBU ដើម្បីចែករំលែកព័ត៌មាន អំពីយុទ្ធជនកូរ៉េខាងជើងនៅអ៊ុយក្រែន។ ទាំងរុស្ស៊ី និងកូរ៉េខាងជើង មិនមានប្រតិកម្ម ចំពោះរបាយការណ៍ស៊ើបការណ៍សម្ងាត់នេះទេ៕