សេវាសង្គ្រោះបន្ទាន់ នៅថ្ងៃអាទិត្យ (ទី១២ ខែមករា) នេះ បានឲ្យដឹងថា មានអ្នកសា្លប់ ៦នាក់ នៅពេលដែលបំពង់ស៊ីឡាំងឧស្ម័នអ៊ីដ្រូកាបូន បានផ្ទុះនៅភោជនីយដ្ឋានមួយនៅភាគពាយព្យនៃទីក្រុង Most របស់ប្រទេសឆេក ដោយបានបង្កជាអគ្គិភ័យឆាបឆេះអគារនេះ។

សេវាសង្គ្រោះអគ្គិភ័យរបស់ឆេក បានឲ្យដឹងនៅលើវេទិកាបណ្ដាញសង្គម X ថា មនុស្ស ៨នាក់ បានរងរបួស នៅក្នុងហេតុការណ៍ផ្ទុះដ៏ខ្លាំងក្លានេះ ដែលបានកើតឡើងកាលពីល្ងាចថ្ងៃសៅរ៍ (ទី១១ ខែមករា) ហើយមនុស្ស ៣០នាក់ ត្រូវបានជម្លៀសចេញពីភោជនីយដ្ឋាននេះ និងអគារ នៅជុំវិញនោះ។

អង្គភាពពន្លត់អគ្គិភ័យបានឲ្យដឹងថា៖ «យោងតាមព័ត៌មានបឋមពីសាក្សី បានឲ្យដឹងថា ម៉ាស៊ីនកម្ដៅ ១គ្រឿង បានផ្អៀងក្រឡាប់បណ្ដាលឲ្យមានអគ្គិភ័យឆាបឆេះឡើង»។ ហើយរដ្ឋមន្ត្រីក្រសួងមហាផ្ទៃលោក Vit Rakusan បានប្រាប់វិទ្យុឆេកថា មូលហេតុទំនងជាដោយសារម៉ាស៊ីនកម្តៅប្រើឧស្ម័នអ៊ីដ្រូកាបូនផ្អៀងក្រឡាប់ នៅសួនច្បារខាងមុខភោជនីយដ្ឋាន។

កងពន្លត់អគ្គិភ័យ បានឲ្យដឹងបន្ថែមថា ខ្លួនបានជួយសង្គ្រោះភ្ញៀវរបស់ភោជនីដ្ឋានរងរបួសធ្ងន់ម្នាក់ ដែលជាប់ក្នុងបន្ទប់ទឹក។ វិទ្យុឆេក បានផ្សាយថា មានភ្ញៀវប្រហែល ២០នាក់នៅក្នុងភោជនីយដ្ឋាននោះ នៅពេលដែលការផ្ទុះកើតមានឡើង៕