ភ្នំពេញ ÷ នៅព្រឹកថ្ងៃទី១២ ខែមករា ២០២៥ សមាគមថ្នាលយុវជនកម្ពុជា បានធ្វើសន្និបាតបូកសរុបការងារ ប្រចាំ២០២៤ និងលើកទិសដៅការងារឆ្នាំ ២០២៥ នាវិមាន៧មករា ទីស្នាក់ការកណ្តាល គណបក្សប្រជាជនកម្ពុជា ក្រោមអធិតីភាព ឯកឧត្តម ផេង គីមស្រ៊ុន ប្រធានកិត្តិយស នៃសមាគមថ្នាលយុវជនកម្ពុជា (ស.ថ.យ.ក)។ កិច្ចប្រជុំនេះមានការចូលរួមពី ក្រុមប្រឹក្សា    ភិបាល ទីប្រឹក្សា និង សមាជិកសមាជិកា សមាគមគ្រប់ជាន់ថ្នាក់មកពីតាមបណ្តារាជធានី-ខេត្ត ក្រុង-ស្រុក នៅទូទាំងប្រទេសកម្ពុជា សរុបចំនួន ២៨០ អង្គ/នាក់។

ថ្លែងនៅឱកាសនោះឯកឧត្តម ផេង គីមស្រ៊ុន បានធ្វើការកោតសសើរ និងវាយតម្លៃខ្ពស់ ចំពោះសកម្មភាពរបស់សមាគមថ្នាលយុវជនកម្ពុជា ដោយនៅក្នុងឆ្នាំ២០២៤កន្លងមកនេះ សមាជិកសមាជិកាទាំងអស់ បានខិតខំប្រឹងប្រែង និងយ៉ាងសកម្ម ក្នុងសកម្មភាពសង្គមជាច្រើន។ ដូច្នេះដើម្បីកាន់តែប្រសើរជាងនេះ ឯកឧត្តមប្រធាន សូមឱ្យសមាជិកសមា ជិកា សកម្មទាំងអស់ត្រូវខិតខំប្រឹងប្រែងការងារបន្តទៀតសម្រាប់ឆ្នាំ២០២៥ និងកសាងកម្លាំងឱ្យកាន់តែធំ ដើម្បីចូលរួមធ្វើសកម្មភាពបម្រើសង្គម ក្នុងនោះត្រូវប្រឹងប្រែងកៀរគរកម្លាំងយុវជនឱ្យបានកាន់តែច្រើន ដើម្បីជាកម្លាំងគាំទ្រគណបក្សប្រជាជនកម្ពុជា និងចូលរួមទប់ស្កាត់ព័ត៌មានក្លែងក្លាយនៅក្នុងសង្គម។

ក្នុងនាមជាប្រធានកិត្តិយសរបស់សមាគមឯកឧត្តម ផេង គីមស្រ៊ុន បានបង្ហាញការរីករាយនិងវាយតម្លៃខ្ពស់ ចំពោះសកម្មភាពរបស់សមាគមថ្នាលយុវជនកម្ពុជា។ ឯកឧត្តមបានគូសបញ្ជាក់ថា បើទោះបីសមាគមទើបតែធ្វើសមាជបាន៣ដង ប៉ុណ្ណោះ តែបានធ្វើសកម្មភាព យ៉ាងសកម្មជាច្រើននៅក្នុងសង្គម ហើយបង្កើតបានរចនាសម្ព័ន្ធនៅគ្រប់រាជធានី-ខេត្ត និងក្រុង-ស្រុកជាច្រើននៅក្នុងប្រទេសកម្ពុជា។ ជាពិសេសបានកៀរគរកម្លាំងយុវជនបានកាន់តែច្រើន ដើម្បីចូលរួមធ្វើសកម្មភាពជាមួយសមាគម។

នៅក្នុងកិច្ចប្រជុំនេះដែរប្រធានសមាគមលោក ម៉ៅ ផល្លា ក៏បានឡើងបង្ហាញនូវសមិទ្ធផលការងារ និងសកម្មភាពមួយចំនួន ដែលសមាគមបានធ្វើ ដែលជាការងាររួមចំណែកក្នុងការកសាងសង្គមជាតិ និងលើកបង្ហាញនូវផែនការមួយចំនួនទៀត សម្រាប់ឆ្នាំ២០២៥ និងពង្រឹងសកម្មភាពរបស់សមាគមឱ្យកាន់តែសកម្មថែមទៀតនៅក្នុងសង្គម ជាពិសេសនៅក្នុងដំណាក់ កាលបញ្ចកោណ ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី។

ក្នុងនាមជាជំនួយការសម្តេចតេជោ ហ៊ុន សែន ប្រធានគណបក្សប្រជាជនកម្ពុជា ឯកឧត្តម ផេង គីមស្រ៊ុន បានថ្លែងអំណរគុណដល់ សមាគមថ្នាលយុវជនកម្ពុជា ដែលបានដាក់ចេញនូវផែនការសកម្មភាព និងជំហរយ៉ាងច្បាស់លាស់ គាំទ្រការដឹកនាំរបស់សម្តេចតេជោ ហ៊ុន សែន និងគាំទ្រគណបក្សប្រជាជនកម្ពុជានាពេលកន្លងមក បន្តរហូតដល់សម្តេចធិបតី ហ៊ុន ម៉ាណែត។ ឯកឧត្តមក៏បានណែនាំឱ្យសមាគមប្រឹងប្រែងធ្វើសកម្មភាពបន្ថែម និងពន្យល់ដល់យុវជន អំពីគោលនយោបាយដឹកនាំ និងសមិទ្ធផលទាំងឡាយរបស់ជាតិ ដែលកើតចេញពីការដឹកនាំរបស់ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បន្តដល់សម្តេចធិបតី ហ៊ុន ម៉ាណែត៕ 12/1/25

អត្ថបទៈ សំ ងីម