រដ្ឋមន្ត្រីការបរទេស និងអ្នកការទូតជាន់ខ្ពស់មកពីប្រទេសលោកខាងលិច និងមជ្ឈិមបូព៌ា កំពុងជួបជាមួយរដ្ឋមន្ត្រីការបរទេសថ្មីរបស់ប្រទេសស៊ីរី ក្នុងរដ្ឋធានីរីយ៉ាដ ប្រទេសធអារ៉ាប់ប៊ីសាអ៊ូឌីត នាថ្ងៃអាទិត្យ (ទី១២ ខែមករា) នេះ ជាកិច្ចប្រជុំថ្នាក់តំបន់បែបនេះលើកដំបូង ស្តីពីសា្ថនភាពរបស់ស៊ីរី គិតចាប់តាំងពីប្រធានាធិបតី លោក Bashar al-Assad ត្រូវបានទម្លាក់ចេញពីតំណែង ក្នុងខែធ្នូ ឆ្នាំ២០២៤។

រដ្ឋមន្ត្រីការបរទេសអាល្លឺម៉ង់ លោកស្រី Annalena Baerbock បានទៅដល់ទីក្រុងរីយ៉ាដ នៅព្រឹកថ្ងៃទី១២ ខែមករានេះ មុនជំនួបជាមួយរដ្ឋមន្ត្រីការបរទេសស៊ីរី លោក Asaad Hassan Al-Shibani។ ហើយបើយោងតាមសេចក្តីថ្លែងការណ៍ដែលចេញដោយការិយាល័យការបរទេសចក្រភពអង់គ្លេស បានឲ្យដឹងថា រដ្ឋមន្ត្រីការបរទេសអង់គ្លេស លោក David Lammy ក៏ត្រូវបានរំពឹងថា នឹងចូលរួមកិច្ចពិភាក្សានេះផងដែរ។

បណ្ដារដ្ឋមន្ត្រីការបរទេសមកពីប្រទេសអារ៉ាប៊ីសាអ៊ូឌីត អេហ្ស៊ីប អារ៉ាប់រួម កាតា បារ៉ែន អ៊ីរ៉ាក់ ហ្ស៊កដានី លីបង់ និងទួរគី បានទៅចូលរួមកិច្ចប្រជុំនៅថ្ងៃទី១២ ខែមករានេះ នៅទីក្រុងរីយ៉ាដ ហើយបេសកជនមកពីសហភាពអឺរ៉ុប និងសហរដ្ឋអាមេរិក ក៏មានវត្តមានផងដែរ។ បណ្ដាមន្ត្រីជាន់ខ្ពស់របស់អារ៉ាប់ និងលោកខាងលិចត្រូវបានគេរំពឹងថា នឹងចូលរួមក្នុងកិច្ចពិភាក្សានេះ។

គួរបញ្ជាក់ថា កិច្ចប្រជុំនេះគឺជាលើកទី១ ហើយ ដែលរួមបញ្ចូលទាំងមេដឹកនាំថ្មីរបស់ស៊ីរី និងមន្ត្រីជាន់ខ្ពស់លោកខាងលិច ហើយនឹងត្រូវដឹកនាំដោយអារ៉ាប៊ីសាអ៊ូឌីត៕