លទ្ធផលបណ្តោះអាសន្ន នៅថ្ងៃអាទិត្យ (ទី១២ ខែមករា) នេះ បានបង្ហាញថា គណបក្សកាន់អំណាចរបស់ប្រទេសឆាដ បានឈ្នះអាសនៈចំនួន ២ភាគ៣ នៅក្នុងការបោះឆ្នោតសភាដែលត្រូវបានធ្វើពហិការដោយក្រុមប្រឆាំងជាច្រើន កាលពីខែមុន ដោយលទ្ធផលនេះបានពង្រឹងដល់ការកាន់អំណាចរបស់ប្រធានាធិបតី លោក Mahamat Idriss Deby។

លទ្ធផលនៃការបោះឆ្នោតថ្ងៃទី២៩ ខែធ្នូ ឆ្នាំ២០២៤ បញ្ជាក់ពីការផ្ទេរអំណាចរបស់ប្រទេសអាហ្រ្វិកកណ្តាលដែលផលិតប្រេងមួយនេះទៅកាន់ការគ្រប់គ្រងបែបរដ្ឋធម្មនុញ្ញ ដែលមានរយៈពេលជាង ៣ឆ្នាំបន្ទាប់ពីលោក Deby បានឡើងគ្រប់គ្រងប្រទេសក្រោយការស្លាប់ភ្លាមៗរបស់ឪពុកលោក និងជាអ្នកកាន់តំណែងដ៏យូរអង្វែង គឺលោក Idriss Deby Itno។

ស្ថាប័នបោះឆ្នោតជាតិបានឲ្យដឹងថា គណបក្សរបស់លោក Deby គឺគណបក្ស Patriotic Salvation Movement ទទួលបានអាសនៈចំនួន ១២៤ ក្នុងចំណោម ១៨៨អាសនៈ នៅក្នុងរដ្ឋសភា។ អត្រានៃអ្នកចូលរួមបោះឆ្នោត គឺប្រមាណជា ៥១,៥៦ភាគរយ។ ការបោះឆ្នោតដែលរាប់បញ្ចូលទាំងការបោះឆ្នោតក្រុង និងតំបន់ផងដែរនោះ គឺជាការបោះឆ្នោតលើកដំបូងរបស់ប្រទេសឆាដ ក្នុងរយៈពេលជាងមួយទសវត្សរ៍។

ប៉ុន្តែគណបក្ស Transformateurs របស់មេដឹកនាំប្រឆាំងលោក Succes Masra និងមេដឹកនាំមួយចំនួនទៀត បានធ្វើពហិការមិនចូលរួមការបោះឆ្នោត ដោយនិយាយថា ការបោះឆ្នោតនេះមានលក្ខណៈមិនច្បាស់លាស់ និងខ្វះតម្លាភាព។ រដ្ឋាភិបាលបានបដិសេធរឿងនេះ៕