អ្នករត់ប្រណាំងរាប់សិបនាក់បានស៊ូទ្រាំនឹងអាកាសធាតុកកដ៏ត្រជាក់ខ្លាំងកាលពីថ្ងៃអាទិត្យ (១២ មករា) នៅក្នុងតំបន់ Yakutia នៃប្រទេសរុស្ស៊ី សម្រាប់ការរត់ម៉ារ៉ាតុងឆ្លងកាត់ព្រៃដ៏ធំល្វឹងល្វើយ ជាមួយនឹងសីតុណ្ហភាពនៅជុំវិញកម្រិត -៥០អង្សាសេ លាយលំនឹងខ្យល់ដ៏រងា។

ខណៈដែលការរត់ម៉ារ៉ាតុងនៅក្នុងលក្ខខណ្ឌអាកាសធាតុល្អធម្មតាបង្កជាបញ្ហាប្រឈមដ៏ធ្ងន់ធ្ងរសម្រាប់អត្តពលិករួចទៅហើយនោះ ការរត់ក្នុងអំឡុងពេលត្រជាក់ខ្លាំងបែបនេះកាន់តែបន្ថែមកម្រិតលំបាកខ្លាំងឡើងសម្រាប់អ្នកចូលរួម។

អ្នករត់ប្រណាំងត្រូវបានគេមើលឃើញរត់តាមដងផ្លូវពោរពេញដោយព្រិលទឹកកកយ៉ាងក្រាស់ ជាមួយនឹងសក់ និងរោមភ្នែករបស់ពួកគេប្រែជាពណ៌សដោយសារព្រិល ហើយផឹកទឹកក្តៅជំនួសឱ្យទឹកត្រជាក់ដើម្បីបន្ថែមជាតិទឹក និងរក្សាកម្ដៅក្នុងខ្លួន។

តំបន់ អ៊ុមយ៉ាកាន់ស្គី (Oymyakonsky) ត្រូវបានគេស្គាល់ផងដែរថាជា "ប៉ូលត្រជាក់" គឺជាតំបន់មួយក្នុងចំណោមតំបន់ត្រជាក់បំផុតរបស់ពិភពលោកដែលមានប្រជាជនរស់នៅនៅជាអចិន្ត្រៃយ៍។ អាកាសធាតុបែបនេះគឺជារឿងធម្មតាទៅហើយសម្រាប់តំបន់នោះក្នុងរដូវរងារ ជាមួយនឹងសីតុណ្ហភាពទាបខ្លាំងបំផុតរបស់ខ្លួនដែលបានកត់ត្រាគឺ -៦៧,៧អង្សាសេ ក្នុងឆ្នាំ១៩៣៣៕