ភ្នំពេញ៖ ការបាត់បង់ឯកឧត្ដមកិត្តិនីតិកោសលបណ្ឌិត ងួន ញ៉ិល គឺជាការបាត់បង់នូវឥស្សរជននយោបាយខ្មែរដ៏ ឆ្នើមមួយរូបដែលពោរពេញដោយឆន្ទៈមនសិការក្នុងការបម្រើបុព្វហេតុ ជាតិ សាសនា ព្រះមហាក្ស ត្រ។ នេះបើតាមសារលិខិតរំលែកមរណទុក្ខរបស់សម្ដេចអគ្គមហាសេនាបតីតេជោ ហ៊ុន សែន នាយក រដ្ឋមន្ត្រី ផ្ញើជូនឯកឧត្ដម ងួន សុជាតិ អ្នកតំណាងរាស្ត្រ និងលោកជំទាវ ព្រមទាំងក្រុមគ្រួសារនៃសព។

សារលិខិតរបស់សម្ដេចតេជោដដែលក៏បានចាត់ទុកមរណភាពរបស់ឯកឧត្ដមកិត្តិនីតិកោសលបណ្ឌិត ងួន ញ៉ិល អនុប្រធានទី១ នៃរដ្ឋសភា ថា ជាការបាត់បង់នូវលោកឪពុក និងជីតាដែលប្រកបដោយសង្គ ហធម៌ និងព្រហ្មវិហារធម៌មិនចេះរីងស្ងួតផងដែរ។

ក្រៅពីការសោកស្ដាយគ្មានអ្វីប្រៀបផ្ទឹមបានចំពោះមរណភាពរបស់ឯកឧត្ដមកិត្តិនីតិកោសលបណ្ឌិត ងួន ញ៉ិល គណបក្សប្រជាជនកម្ពុជាក៏បានសច្ចាចារឹកទុកនូវរាល់ស្នាដៃ ឧត្ដមគតិ គំរូវីរភាព និងគុណ បំណាច់របស់ឯកឧត្ដមកិត្តិនីតិកោសលបណ្ឌិត ងួន ញ៉ិល ថា ជាកុលបុត្រដ៏ប្រពៃ ជាថ្នាក់ដឹកនាំដ៏ល្អ និង ជាសកម្មជនដ៏ឆ្នើមរបស់គណបក្ស ដែលធ្លាប់បានធ្វើពលិកម្មគ្រប់បែបយ៉ាងដើម្បី ជាតិ សាសនា ព្រះមហាក្សត្រ និងគណបក្សប្រជាជនកម្ពុជា នាពេលកន្លងមក។

មរណភាពរបស់ឯកឧត្ដមកិត្តិនីតិកោសលបណ្ឌិត ងួន ញិល អនុប្រធានទី១ នៃរដ្ឋសភា គឺជាការបាត់ បង់ដ៏ធំធេងនូវ ឪពុក ឪពុកក្មេក ជីតា ជីតាទួត ជាទីគោរពស្រលាញ់ប្រកបដោយគុណធម៌ ព្រហ្មវិហារ ធម៌ ដែលក្នុងមួយជីវិតរបស់ឯកឧត្ដមបានពលិកម្មជាច្រើន បូជាទាំងកម្លាំងកាយ ចិត្ត ជម្នះរាល់ឧបស គ្គនានា ក្នុងការឃុំគ្រងថែរក្សាក្រុមគ្រួសារពោរពេញដោយភាពកក់ក្ដៅ។ នេះបើតាមសារលិខិតរបស់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះឯកឧត្ដម ងួន សុជាតិ តំណាងរាស្ត្រមណ្ឌលខេត្តកំពង់ចាម និងលោកជំទាវ ព្រមទាំងក្រុមគ្រួសារ។

សារលិខិតរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាដដែលបន្ត ថា លើសពីនេះទៅទៀត មរណភាពរបស់ឯកឧត្ដមកិត្តិនីតិកោសលបណ្ឌិត ងួន ញិល ពិតជាការបាត់ បង់ដ៏ធំធេងនូវឥស្សរជននយោបាយឆ្នើមមួយរូបរបស់កម្ពុជា ដែលបានចូលរួមចំណែកដឹកនាំស្ថាប័ន រដ្ឋសភា ក្នុងការពង្រឹងនីតិរដ្ឋ និងធ្លាប់មានគុណបំណាច់ក្នុងការកសាងជាតិមាតុភូមិ បន្សល់ទុកនូវស្នា ដៃជាច្រើនក្នុងការងារជំនាញជាបន្តបន្ទាប់ ដើម្បី ជាតិ សាសនា ព្រះមហាក្សត្រ ដែលពិតជាមិនអាច កាត់ថ្លៃបានឡើយ។

ឯកឧត្តម ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភានៅព្រឹកថ្ងៃទី៥ ខែវិច្ឆិកាបានថ្លែងប្រាប់ BTV ថា ឯកឧត្តមកិត្តិនីតិកោសលបណ្ឌិត ងួន ញ៉ិល អនុប្រធានទី១ នៃរដ្ឋសភា បានទទួលមរ ណភាពក្នុងអាយុ ៧៩ឆ្នាំ នៅវេលាម៉ោង១០និង៣០នាទី នាព្រឹកថ្ងៃទី៥ ខែវិច្ឆិកា ឆ្នាំ២០២១នេះ។ សពឯកឧត្តម ងួន ញ៉ិល កំពុងតម្កល់នៅគេហដ្ឋានរបស់ឯកឧត្តម ដើម្បីរៀបចំធ្វើបុណ្យតាមប្រពៃណី។

គួរបញ្ជាក់ថា ឯកឧត្តម ងួន ញ៉ិល បានក្លាយជាសមាជិករដ្ឋសភា ក្នុងអាណត្តិទី១ និងជាតំណាងរាស្រ្ត

មណ្ឌលខេត្តកំពង់ធំ និងត្រូវបានទទួលតំណែងជាអនុប្រធានទី១នៃរដ្ឋសភាចំនួន៤ អាណ្ណត្តិ។ ក្នុងពេ លបច្ចុប្បន្ននេះ ឯកឧត្តម ងួន ញ៉ិល ជាសមាជិកគណៈអចិន្ត្រៃយ៍នៃគណៈកម្មាធិការកណ្តាលគណប ក្សប្រជាជនកម្ពុជា និងជាប្រធានក្រុមការងារថ្នាក់កណ្តាលគណបក្សប្រជាជនកម្ពុជាចុះជួយខេត្តកំពង់ធំផងដែរ។

កាលពីថ្ងៃទី១៨ ខែកក្កដា ឆ្នាំ២០២០ ឯកឧត្តម ងួន ញ៉ិល ត្រូវបាន ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី ព្រះមហាក្សត្រ ទ្រង់បានសព្វព្រះរាជហឫទ័យ ត្រាស់បង្គាប់ ផ្ដល់គោរម ងារកិត្តិយសជូនឯកឧត្តមជា «កិត្តិនីតិកោសលបណ្ឌិត» ៕​ ដោយ៖ គង់ ឌិន​