ការស្ទង់មតិមួយបានបង្ហាញថា ប្រជាជនអ៊ុយក្រែន៥៧ភាគរយនិយាយថា ពួកគេត្រៀមខ្លួនដើម្បីស៊ូទ្រាំទៅនឹងជម្លោះជាមួយរុស្ស៊ីក្នុងភាពចាំបាច់ ដែលបានធ្លាក់ចុះ១៦ភាគរយ ពីតួលេខកាលពីឆ្នាំមុន។ រុស្ស៊ី បានចាប់ផ្តើមវាយលុកលើអ៊ុយក្រែន រយៈពេលជិតបីឆ្នាំកន្លងទៅ។

វិទ្យាស្ថានសង្គមវិទ្យាអន្តរជាតិទីក្រុងគីវ បានធ្វើការស្ទង់មតិកាលពីខែមុន។ អ្នកដែលបានឆ្លើយថាពិបាកនិយាយ ថាតើពួកគេត្រៀមខ្លួនស៊ូទ្រាំចំពោះសង្គ្រាមបានយូរប៉ុណ្ណានោះ បានកើនឡើង ១១ ភាគរយដល់ ១៨ ភាគរយ។ នាយកប្រតិបត្តិនៃវិទ្យាស្ថាន លោក Anton Hrushetskyi បាននិយាយថា ការពិតសំខាន់បំផុត គឺស្ថានភាពនៅសមរភូមិមុខ។

លោក និយាយថា ប្រជាជនអ៊ុយក្រែន បានមើលឃើញថា ពួកគេកំពុងបាត់បង់ដែនដីនៅភាគបូព៌ា ហើយនេះ បានធ្វើឲ្យប៉ះពាល់ដល់អារម្មណ៍ និងមតិសាធារណៈ។ លោកនិយាយថា មនុស្សជាច្រើនបានចាប់ផ្តើមគិតថា វាជាការប្រសើរក្នុងការបញ្ឈប់ការប្រយុទ្ធគ្នា និងចុះហត្ថលេខាលើកិច្ចព្រមព្រៀងសន្តិភាព។ លោក Hrushetskyi និយាយថា ប្រជាជន មិនទាមទារសន្តិភាពក្នុងការបាត់បង់ណាមួយឡើយនៅពេលនេះ ដោយបង្ហាញថា ការធានាបានសុវត្ថិភាពសម្រាប់អ៊ុយក្រែន គឺជាគន្លឹះក្នុងការទទួលបានសន្តិភាព។

អ៊ុយក្រែន ត្រូវបានគេជឿថាបានបាត់បង់ផ្ទៃដីជាង៣.៦០០គីឡូម៉ែត្រក្រឡា កាលពីឆ្នាំមុន រួមទាំងតំបន់ភាគខាងកើតទីក្រុង Donetsk និងទីក្រុង Kharkiv ។

អាជ្ញាធរតំបន់និយាយថា ចំនួនប្រជាជនដែលបានជម្លៀសទៅកាន់រដ្ឋធានីគីវ បានកើនឡើង១១.០០០នាក់ ក្នុងរយៈពេលមួយឆ្នាំ។

ប្រជាជនមួយចំនួននៅតំបន់មួយក្នុងទីក្រុងគីវ ដែលគាំទ្រអ្នកជម្លៀសចេញពីទីក្រុង Donetsk និងកន្លែងផ្សេងទៀត បានសម្តែងក្តីសង្ឃឹមថា ការឈ្លានពានរបស់រុស្ស៊ីនឹងបញ្ចប់ក្នុងពេលឆាប់ៗនេះ។