ការឡោមព័ទ្ធរបស់យោធាអ៊ីស្រាអែល នៅភាគខាងជើងតំបន់ហ្កាហ្សាស្ទ្រីប បានធ្វើឱ្យប្រជាជនប៉ាឡេស្ទីនប្រហែល ៥.០០០នាក់ បានស្លាប់ ឬបាត់ខ្លួន បន្ទាប់ពីការវាយប្រហារដ៏ឃោរឃៅរយៈពេល ១០០ថ្ងៃ ដែលកាន់តែខ្លាំង ស្របពេលការពិភាក្សាអំពីលទ្ធភាពនៃកិច្ចព្រមព្រៀងសម្របសម្រួលបទឈប់បាញ់រវាងអ៊ីស្រាអែល និងក្រុមហាម៉ាស។

ប្រភពវេជ្ជសាស្រ្តមួយបានប្រាប់សារព័ត៌មាន Al Jazeera កាលពីថ្ងៃអាទិត្យ (១២ មករា) ថា ជនជាតិប៉ាឡេស្ទីន ៩.៥០០នាក់ ផ្សេងទៀតបានរងរបួស ដោយសារប្រតិបត្តិការយោធាអ៊ីស្រាអែល នៅភាគខាងជើង ដែលបានចាប់ផ្តើមនៅដើមខែតុលា ឆ្នាំ២០២៤ មក។

ការិយាល័យប្រព័ន្ធផ្សព្វផ្សាយរដ្ឋាភិបាលនៃតំបន់ហ្កាហ្សា កាលពីថ្ងៃអាទិត្យ បានពណ៌នាការឡោមព័ទ្ធរបស់អ៊ីស្រាអែល ថាជា "ទម្រង់ដ៏គួរឱ្យរន្ធត់បំផុតនៃការបោសសម្អាតជនជាតិភាគតិច ការផ្លាស់ទីលំនៅ និងការបំផ្លិចបំផ្លាញ" ដែលប៉ះពាល់ដល់មនុស្សរាប់សែននាក់នៅក្នុងតំបន់ហែកហួរដោយសង្រ្គាម។

អ៊ីស្រាអែល និយាយថា សកម្មភាពយោធារបស់ខ្លួននៅភាគខាងជើងហ្កាហ្សា នោះគឺដើម្បីរារាំងក្រុមសកម្មប្រយុទ្ធហាម៉ាស មិនឱ្យប្រមូលផ្ដុំគ្នាឡើងវិញ។ ការវាយប្រហារដ៏ឥតឈប់ឈរក៏កំពុងកំណត់គោលដៅលើតំបន់ផ្សេងទៀតនៅទូទាំងតំបន់ហ៊ុមព័ទ្ធជាច្រើនដងជារៀងរាល់ថ្ងៃ ដោយការវាយប្រហារមួយចំនួនចុងក្រោយបំផុតផ្ដោតទៅលើជំរំជនភៀសខ្លួន Bureij នៅកណ្តាលហ្កាហ្សា៕