ភ្នំពេញ៖ ខណៈទ្រាំទ្រមិនបាននឹងក្លិនផ្សែងកម្ទេចក្រណាត់ស្ទើររាល់ថ្ងៃពីក្រុមហ៊ុន ឃូឃូ ដែលនៅក្បែររបងលំនៅដ្ឋាន មានប្រជាពលរដ្ឋប្រមាណ ២០គ្រួសារ ដែលកំពុងរស់នៅភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ ទទូចស្នើសុំជាថ្មីដល់អាជ្ញាធរពាក់ព័ន្ធដោះស្រាយជូនពួកគាត់។
ប្រជាពលរដ្ឋរស់នៅក្នុងបុរី លឹម ឈាងហាក់ សង្កាត់កន្ទោក ខណ្ឌកំបូល រាជធានីភ្នំពេញ បាននាំគ្នាសម្តែងក្តីព្រួយយ៉ាងចំពោះបញ្ហារងផលប៉ះពាល់សុខភាព ព្រោះតែសកម្មភាពដុតកម្ទេចក្រណាត់ចេញពីក្រុមហ៊ុនរោងចក្រ ឃូឃូ (ខេមបូឌា) អិនធើណេសិនណល។
លោក នុត សោភា និងអ្នកស្រី ណុល រដ្ឋា តំណាងពលរដ្ឋជាង ២០គ្រួសារក្នុងបុរី លឹម ឈាងហាក់ រៀបរាប់ថា នៅថ្ងៃទី៥ ខែវិច្ឆិកា ឆ្នាំ២០២១ថា សព្វថ្ងៃពិតជាពិបាករស់នៅក្នុងបរិយាកាសខ្លាំងណាស់ ដោយសារតែស្រូបក្លិនផ្សែងពុលនានាដែលភាយចេញពីក្រុមហ៊ុនខាងលើ។
ប្រជាពលរដ្ឋ បន្តទៀតថា ក្លិនផ្សែងក្រណាត់ កំពុងបង្កផលប៉ះពាល់ដល់សុខភាព និងបរិស្ថានរស់នៅរបស់ក្មេងចាស់ប្រុសស្រី ជាពិសេសស្ត្រីមានផ្ទៃពោះតែម្តងងាយប្រឈមនឹងកើតជំងឺមហារីក ក៏ដូចជា ជម្ងឺ ផ្សេងៗទៀតផង ។ នៅពេលចម្អិនអាហារវិញ ពេលខ្លះកម្ទេចក្រណាត់ដែលដុតចេញពីរោងចក្របានហោះរសាត់តាមខ្យល់ចូលក្នុងឆ្នាំងចានសម្លក៏មានដែរ។
សូម្បីតែសំលៀកបំពាក់ក៏ជាប់ក្លិនអាក្រក់ទៀតផង ទើបភាគច្រើនពួកគាត់នាំគ្នាសម្ងំតែក្នុងផ្ទះពុំហ៊ានដើរចេញមកក្រៅផ្ទះឡើយ បើគ្មានការចាំបាច់។ បើនិយាយពីការជូតបោសសម្អាតផ្ទះវិញមិនឈ្នះនោះទេ។
លោក នួន កំសាន្ត នាយករងសាលាបឋមសិក្សា អូរឌឹម អះអាងដែរថា ពេលដែលម៉ោងរោងចក្រ ឃូឃូ ដុតកម្ទេចក្រណាត់ម្តងៗធ្វើឱ្យកុមារដែលជាសិស្សានុសិស្សរៀនក្នុងថ្នាក់ត្អូញត្អែរថា ពិបាកដកដង្ហើម ឈឺក្បាល ព្រមទាំងវិលមុខជាដើម ពីព្រោះហ៊ុព័ន្ធដោយផ្សែងពុល។ កន្លងទៅ តំណាងសាលារៀន និងប្រជាពលរដ្ឋ ធ្លាប់ធ្វើស្នើសុំកិច្ចអន្តរាគមន៍ដោះស្រាយពីលោកចៅសង្កាត់ លោកអភិបាលខណ្ឌ ក៏ដូចជាការិយាល័យជំនាញជាច្រើនលើកច្រើនសារមកហើយ ក៏ប៉ុន្តែដំណោះស្រាយមានតិចតួចណាស់ពុំទាន់ទទួលយកបានសោះឡើយ។
ជាថ្មីម្តងទៀតនេះ ពួកគាត់ទទូចស្នើសុំលោក ឃឹម ស៊ុនសូដា អភិបាលខណ្ឌកំបូល លោក គាត រង្សីប្រធានមន្ទីរបរិស្ថានរាជធានី ជាពិសេសគឺឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ មេត្តាជួយពិនិត្យដោះស្រាយជូនពលរដ្ឋរងប៉ះពាល់ធ្វើយ៉ាងណាបញ្ឈប់ការដុតកមន្ទេចក្រណាត់ផងដែរ ករណីគ្មានដំណោះស្រាយទេអាយុជីវិតរបស់ពួកគាត់ប្រហែលរស់មិនបានយូរនោះទេ គ្រាផ្សែងពុលដែលបំភាយពុំមានថ្ងៃលោះសោះ ។
ពាក់ព័ន្ធបញ្ហានេះ កាលពីរសៀលថ្ងៃទី៥ ខែវិច្ឆិកា ឆ្នាំ២០២១ ភ្នាក់ងារទូរទស្សន៍ប៊ីធីវី បានទាក់ទងទៅកាន់លោក ឃឹម ស៊ុនសូដា អភិបាលខណ្ឌកំបូល ដើម្បីបកស្រាយពន្យល់ពីវិធានការតាមអ្វីដែលជាពលរដ្ឋស្នើសុំ តែលោកបានលើកទូរស័ព្ទនិយាយកំពុងជាប់ប្រជុំ៕ អត្ថបទ៖ តារាវុទ្ធី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
