កូរ៉េខាងត្បូង គ្រោងនឹងកែលម្អរចនាសម្ព័ន្ធដែលដាក់អង់តែនណែនាំការចុះចតនៅអាកាសយានដ្ឋានរបស់ខ្លួននៅឆ្នាំនេះ បន្ទាប់ពីគ្រោះថ្នាក់ធ្លាក់យន្តហោះ Jeju Air ដ៏ធ្ងន់ធ្ងរកាលពីខែធ្នូ ក្នុងពេលដែលយន្តហោះធ្លាក់ចេញពីផ្លូវរត់ និងផ្ទុះឆេះ បន្ទាប់ពីបុករចនាសម្ព័ន្ធជញ្ជាំងបែបនេះ។

ក្រសួងដឹកជញ្ជូន ដែលបាននឹងកំពុងត្រួតពិនិត្យលក្ខខណ្ឌសុវត្ថិភាពនៅក្រុមហ៊ុនអាកាសចរណ៍ និងអាកាសយានដ្ឋាន ចាប់តាំងពីយន្តហោះ Boeing 737-800 បានធ្លាក់នៅអាកាសយានដ្ឋាន Muan ភាគនិរតីមក បានប្រកាសពីការផ្លាស់ប្តូររចនាសម្ព័ន្ធនេះនៅថ្ងៃចន្ទ ១៣ មករា។

ក្រសួងបាននិយាយនៅក្នុងសេចក្តីថ្លែងការណ៍មួយថា អាកាសយានដ្ឋានក្នុងស្រុកចំនួន៧ រួមទាំងនៅទីក្រុង Muan ត្រូវបានគេរកឃើញថាមានជញ្ជាំងទំនប់ ឬគ្រឹះដែលធ្វើពីបេតុង ឬដែកដែលត្រូវការការផ្លាស់ប្តូរ។ ក្រសួងបន្ថែមថា ខ្លួននឹងរៀបចំវិធានការកែលម្អរចនាសម្ព័ន្ធនោះនៅក្នុងខែនេះ ហើយមានបំណងបញ្ចប់ការកែលម្អនៅចុងឆ្នាំ២០២៥។

មូលហេតុពិតនៃសោកនាដកម្មនេះនៅមិនទាន់ដឹង ប៉ុន្តែអ្នកជំនាញបានបន្ទោសថា ជញ្ជាំងអាកាសយានដ្ឋានដែលយន្តហោះបានបុក គឺនៅជិតផ្លូវរត់ខ្លាំងពេក។ គួររម្លឹកថា ឧបទ្ទវហេតុធ្លាក់កាលពីថ្ងៃទី២៩ ខែធ្នូ ដែលបានសម្លាប់មនុស្ស ១៧៩នាក់ គឺជាឧបទ្ទវហេតុដ៏អាក្រក់ដំបូងបំផុតរបស់ Jeju Air ចាប់តាំងពីបង្កើតឡើងនៅឆ្នាំ២០០៥ និងជាលើកដំបូងសម្រាប់ក្រុមហ៊ុនអាកាសចរណ៍កូរ៉េទាំងអស់ក្នុងពេលជាងមួយទសវត្សរ៍មកនេះ៕