កងកម្លាំងរដ្ឋាភិបាលយេម៉ែន បាននិយាយកាលពីថ្ងៃសៅរ៍ថា ពួកគេបានវាយបកទៅលើការវាយប្រហារជាច្រើនលើករបស់ក្រុមហ៊ួទី នៅខ្សែត្រៀមជួរមុខមួយចំនួន ដោយបានធ្វើឲ្យ«មានអ្នកស្លាប់និងការបាត់បង់សម្ភារៈយ៉ាងសំខាន់ ទៅលើក្រុមសកម្មប្រយុទ្ធ»។

ក្រសួងការពារជាតិយេម៉ែន បានបញ្ជាក់នៅក្នុងសេចក្តីថ្លែងការណ៍មួយថា កងកម្លាំងរដ្ឋាភិបាល «បានឆ្លើយតបដោយជោគជ័យ និងបានធ្វើការវាយលុកជាច្រើនលើករបស់ក្រុមហ៊ួទីមិនបានសម្រេចគោលដៅ នៅក្នុងខេត្ត Marib, Al-Jawf និង Taiz ក្នុងរយៈពេល ២៤ម៉ោង កន្លងទៅនេះ»។

នៅទីក្រុង Marib កងកម្លាំងយោធា បានការពារប្រឆាំងនឹងការវាយប្រហារ នៅខ្សែត្រៀមជួរមុខ ភាគពាយ័ព្យ ជាកន្លែងដែលក្រុមសកម្មប្រយុទ្ធហ៊ួទី ប្រើប្រាស់កាំភ្លើងធំ អ្នកបាញ់ស៊ីប និងយានដ្រូន។

មន្ត្រីយោធាក្នុងតំបន់ បានបញ្ជាក់ថា៖«មនុស្សជាច្រើននាក់ ត្រូវបានសម្លាប់ពីក្រុមជម្លោះទាំងពីរ ក្នុងអំឡុងពេល ២៤ ម៉ោងចុងក្រោយនេះ ដែលជាលទ្ធផលនៃការប្រយុទ្ធគ្នាឥតឈប់ឈរ ដែលបានកើតឡើងនៅក្នុងតំបន់ផ្សេងៗនៃប្រទេសយេម៉ែន»។

ប្រទេសយេម៉ែន បានជាប់គាំងនៅក្នុងសង្គ្រាមស៊ីវិល រវាងកងកម្លាំងរដ្ឋាភិបាល និងក្រុមហ៊ួទី ចាប់តាំងពីចុងឆ្នាំ ២០១៤។