ប្រទេសអ៊ីរ៉ង់ រៀបចំកិច្ចចរចានុយក្លេអ៊ែរជាមួយបារាំង អង់គ្លេស និងអាល្លឺម៉ង់ នៅថ្ងៃចន្ទនេះ រយៈពេលត្រឹមតែមួយសប្តាហ៍ មុនពេលប្រធានាធិបតីជាប់ឆ្នោតរបស់សហរដ្ឋអាមេរិកលោក ដូណាល់ ត្រាំ ( Donald Trump) ចូលកាន់តំណែង។

កិច្ចពិភាក្សានោះ គឺជាជុំទី២នៃកិច្ចចរចាអំពីកម្មវិធីនុយក្លេអ៊ែររបស់អ៊ីរ៉ង់ ក្នុងរយៈពេលតិចជាងពីរខែ បន្ទាប់ពីកិច្ចប្រជុំលម្អិតដែលបានធ្វើឡើង នៅទីក្រុងហ្សឺណែវ ប្រទេសស្វ៊ីស ក្នុងខែវិច្ឆិកា រវាងទីក្រុងតេអេរ៉ង់ និងមហាអំណាចអឺរ៉ុបទាំងបី ដែលត្រូវបានគេស្គាល់ថា E3។

ក្រសួងការបរទេសអាល្លឺម៉ង់ បានប្រាប់សារព័ត៌មាន AFP ថា៖«ទាំងនេះ មិនមែនជាការចរចាទេ»។ អ៊ីរ៉ង់បានសង្កត់ធ្ងន់ដូចគ្នាថា កិច្ចពិភាក្សានេះ គឺគ្រាន់តែជា «ការពិគ្រោះយោបល់»ប៉ុណ្ណោះ។

ក្រសួងការបរទេសបារាំង បាននិយាយកាលពីថ្ងៃព្រហស្បតិ៍ថា កិច្ចប្រជុំនេះ គឺជាសញ្ញាមួយបង្ហាញថាប្រទេស E3 «កំពុងបន្តធ្វើការឆ្ពោះទៅរកដំណោះស្រាយការទូត ចំពោះកម្មវិធីនុយក្លេអ៊ែរអ៊ីរ៉ង់ ដែលវឌ្ឍនភាពនៃបញ្ហានេះ ពិតជាសំខាន់យ៉ាងខ្លាំង។

កិច្ចប្រជុំនៅថ្ងៃចន្ទនេះ ធ្វើឡើង នៅពេលដែលកម្មវិធីនុយក្លេអ៊ែររបស់អ៊ីរ៉ង់ ទទួលបានការផ្តោតការយកចិត្តទុកដាក់ជាថ្មី នៅមុនការវិលត្រឡប់របស់លោក ត្រាំ ទៅកាន់តំណែងសេតវិមានវិញ នៅថ្ងៃទី ២០ ខែមករានេះ។