ប្រព័ន្ធផ្សព្វផ្សាយរដ្ឋបានរាយការណ៍ថា ការនាំចេញរបស់ប្រទេសចិន បានឡើងដល់កម្រិតខ្ពស់បំផុត នៅឆ្នាំ២០២៤ ជាការជំរុញដ៏វិជ្ជមាន សម្រាប់ប្រទេសដែលមានសេដ្ឋកិច្ចធំជាងគេទី២ របស់ពិភពលោក ខណៈដែលការដំឡើងពន្ធគយតាមពាក្យសន្យារបស់ប្រធានាធិបតីជាប់ឆ្នោត លោក Donald Trump គំរាមកំហែងបង្អាក់ដល់ដំណើរការកំណើននេះ។

នៅថ្ងៃចន្ទ (ទី១៣ ខែមករា) ទិន្នន័យគយបានបង្ហាញថា ការនាំចេញបានកើនឡើង ១០,៧ភាគរយ ធៀបនឹងឆ្នាំមុន ដោយខ្ពស់ជាងការព្យាករណ៍របស់អ្នកសេដ្ឋកិច្ច។ ហើយទិន្នន័យគយ ក៏បានបង្ហាញដែថា ការនាំចូលដែលត្រូវបានរំពឹងទុកយ៉ាងទូលំទូលាយថា នឹងធ្លាក់ចុះនោះ បានកើនឡើង ១ភាគរយ ដែលជាការសម្រេចបានខ្លាំងបំផុត ចាប់តាំងពីខែកក្កដា ឆ្នាំ២០២៤ មក។

ការចេញនូវតួលេខខ្ពស់ជាងការរំពឹងទុកនេះ បានកើតមានឡើង ស្របពេលដែលលោក Trump គ្រោងនឹងវិលត្រលប់ទៅកាន់សេតវិមានវិញ នៅថ្ងៃទី២០ ខែមករា ជាមួយនឹងការមានរបៀបវារៈសេដ្ឋកិច្ចប្រជានិយមដែលរួមមានទាំងការដំឡើងពន្ធលើទំនិញចិនផងដែរ។

បណ្ដាអ្នកសេដ្ឋកិច្ច និយាយថា ពន្ធដែលត្រូវបានស្នើឡើងរបស់លោក Trump ស្ទើរតែប្រាកដណាស់ធ្វើឲ្យមានការឡើងថ្លៃទំនិញ សម្រាប់អ្នកប្រើប្រាស់អាមេរិក និងកាត់បន្ថយកម្រិតប្រាក់ចំណេញរបស់អ្នកនាំចេញចិន។ អ្នកវិភាគ នៅធនាគារស្វីស UBS បានប៉ាន់ប្រមាណថា ការដំឡើងពន្ធ ៦០ភាគរយលើការនាំចូលរបស់ចិន នឹងធ្វើឲ្យកំណើនផលិតផលក្នុងស្រុកសរុប (GDP) របស់ចិន ធ្លាក់ចុះ ២,៥ភាគរយ ក្នុងរយៈពេល ១២ខែបន្ទាប់៕