បើតាមលទ្ធផលជិតផ្លូវការហើយនោះ បានបង្ហាញប្រធានាធិបតីក្រូអាត លោក Zoran Milanovic បានឈ្នះការបោះឆ្នោតឡើងវិញ សម្រាប់អាណត្តិ ៥ឆ្នាំទៀត កាលពីថ្ងៃអាទិត្យ (ទី១២ ខែមករា)។

លោក Milanovic ដែលជាបេក្ខជនរបស់គណបក្សប្រឆាំង គឺសង្គមប្រជាធិបតេយ្យ (SDP) ត្រូវបានគេប៉ាន់ប្រមាណថា បានឈ្នះ ៧៤ភាគរយនៃការបោះឆ្នោត បន្ទាប់ពីសន្លឹកឆ្នោតត្រូវបានរាប់ជាង ៩៩ភាគរយ។ ចំណែកលោក Dragan Primorac បេក្ខជនរបស់គណបក្សសហភាពប្រជាធិបតេយ្យក្រូអាត (HDZ) ដែលកំពុងកាន់អំណាច ទទួលបានសំឡេងគាំទ្រប្រហែល ២៦ភាគរយ។

គួរបញ្ជាក់ថា ប្រទេសក្រូអាតបានរៀបចំការបោះឆ្នោតជុំទិ២ ដែលមានគូប្រជែង ២រូប កាលពីថ្ងៃអាទិត្យ បន្ទាប់ពីបញ្ចប់ការបោះឆ្នោតជុំទី១ កាលពីថ្ងៃទី២៩ ខែធ្នូ។

ការបោះឆ្នោតនេះត្រូវបានធ្វើឡើង ខណៈប្រទេសសមាជិកសហភាពអឺរ៉ុបមានប្រជាជនចំនួន ៣,៨លាននាក់មួយនេះ ជួបប្រទះនឹងអត្រាអតិផរណាខ្ពស់បំផុត ក្នុងតំបន់ចាយប្រាក់អឺរ៉ូ អំពើពុករលួយរីករាលដាល និងកង្វះកម្លាំងពលកម្ម។

លោក Milanovic ត្រូវបានបោះឆ្នោតជ្រើសរើសជាប្រធានាធិបតីលើកដំបូង ក្នុងឆ្នាំ២០២០។ លោកធ្លាប់ធ្វើជានាយករដ្ឋមន្ត្រី ពីចុងឆ្នាំ២០១១ រហូតដល់ដើមឆ្នាំ២០១៦៕