​គុយបា៖ យន្តហោះ​ផ្ទុក​ស្បៀងអាហារ​ជិត ១០​តោន​បាន​មកដល់​ប្រទេស​គុយបា​កាលពី​ថ្ងៃ​សុក្រ ខណៈ​ដែល​អង្គការ​មិនមែន​រដ្ឋាភិបាលសម្លឹង​ទៅ​រក​ការ​គាំទ្រ​ប្រជាជន និង​បង្ហាញ​ពី​ការ​មិន​យល់​ស្រប​របស់​ពួកគេ ចំពោះ​ទណ្ឌកម្ម​ដែល​បាន​ដាក់​ដោយ​សហរដ្ឋអាមេរិក​។ ទំនិញ​ដែល​ប្រគល់​នោះ​មាន​ត្រីខ​កំប៉ុង និង​ប៉ា​ស្តា​ក្នុងចំណោម​ស្បៀងអាហារ​ដទៃ​ទៀត ប៉ុន្តែ​ម្ចាស់​ជំនួយ​បាន​បង្ហាញ​ថា នៅ​ពេល​ក្រោយ​នឹង​ត្រូវ​បាន​បំពេញ​បន្ថែម​ដោយ​ទឹកដោះគោ និង​ប្រេងឆា​។

ផលិតផល​ជា​មូលដ្ឋាន​ទាំងនេះ​តែងតែ​ខ្វះ​ខាត​នៅ​លើ​កោះ​នេះ​។ បុគ្គលិក​អង្គការ Code Pink ដែល​ជា​ម្ចាស់​ជំនួយ​បាន​និយាយ​ថា ​លោកស្រី​មិន​ពេញចិត្ត​ចំពោះ​ការ​ដាក់​ទណ្ឌកម្ម​របស់​សហរដ្ឋអាមេរិក​នោះ​ទេ​។​ ​លោកស្រី​និយាយ​ថា ការ​ដឹក​ជញ្ជូន​នៅ​ពេល​នេះ​គឺ​អាច​ធ្វើ​ទៅ​បាន​ដោយសារតែមនុស្ស​មួយ​ក្រុមតូច​ ដែល​ប្រឆាំង​ទៅ​នឹង​គោលនយោបាយ​របស់​សហ​រដ្ឋ​អាមេរិក​។ លោកស្រី​និយាយ​ថា ​វា​មិន​មែន​ជា​គោលនយោបាយ​ដែល​តំណាង​ឲ្យ​ប្រជាជន​សហរដ្ឋអាមេរិក​នោះ​ទេ​។ ជំនួយ​នេះ​ត្រូវ​បាន​ទទួល​ដោយ​មជ្ឈមណ្ឌល​ Martin Luther King ក្នុង​ទីក្រុងឡា​ហាវ៉ាន់ដែល​ជា​ស្ថាប័ន​ផ្សព្វផ្សាយ​សាសនា ហើយ​នឹង​ត្រូវ​បញ្ជូន​ទៅ​ខេត្ត​ភាគ​ខាងកើត​។​ ​នាយក​មជ្ឈមណ្ឌល Martin Luther King បាន​និយាយ​ថា រដ្ឋបាល​សហរដ្ឋអាមេរិក​បច្ចុប្បន្ន​មិន​បាន​ផ្លាស់ប្ដូរ​អ្វី​ពី​គោលនយោបាយ​ឈ្លានពាន មិន​ស្រឡាញ់ និង​មិន​មែន​ជា​គោលនយោបាយ​សាសនា​គ្រឹស្ត​នោះ​ទេ៕

អត្ថបទ៖ ប៊ុនថន