នាយករដ្ឋមន្ត្រីឥណ្ឌា លោក Narendra Modi បានសម្ពោធផ្លូវរូងក្រោមដីជាយុទ្ធសាស្ត្រ នៅតំបន់ភ្នំហិមាល័យ នាថ្ងៃចន្ទ (ទី១៣ ខែមករា) នេះ ដែលនឹងជួយផ្ដល់លទ្ធភាពចូលដល់ភាគខាងជើង នៅគ្រប់លក្ខខណ្ឌអាកាសធាតុទាំងអស់ ឆ្ពោះទៅកាន់តំបន់ព្រំដែនរយៈកម្ពស់ខ្ពស់ដែលកំពុងមានជម្លោះ ជាមួយគូអរិចិន និងប៉ាគីស្ថាន។

ផ្លូវរូងក្រោមដីឈ្មោះ Z-Morh ឬ Sonmarg ដែលលាតសន្ធឹងប្រវែង ៦,៤គីឡូម៉ែត្រ ឆ្លងកាត់ពីក្រោមភ្នំប្រកបដោយគ្រោះថ្នាក់ ដែលត្រូវបានកាត់ផ្តាច់ដោយការធ្លាក់ព្រិលរយៈពេលពី ៤ ទៅ ៦ខែ ក្នុងមួយឆ្នាំ គឺជាផ្នែកមួយនៃការលើកកម្ពស់ហេដ្ឋារចនាសម្ព័ន្ធកាន់តែទូលំទូលាយ នៅតាមតំបន់ព្រំដែន។

ផ្លូវនេះជួយតភ្ជាប់តំបន់ Kashmir ដែលគ្រប់គ្រងដោយឥណ្ឌាជាមួយតំបន់ Ladakh ដោយដើរតួជាការសម្រេចបាននូវគោលដៅដ៏សំខាន់មួយ ក្នុងការជួយឲ្យបើកដំណើរការផ្លូវហាយវេ Srinagar-Leh Highway បានពេញមួយឆ្នាំ ដើម្បីអនុញ្ញាតឲ្យមានការដាក់ពង្រាយយ៉ាងឆាប់រហ័សនូវការផ្គត់ផ្គង់យោធា។

ដោយមានពាក់អាវធំការពាររងា បន្ទាប់ពីកាត់ខ្សែបូបើកឲ្យដំណើរការគម្រោងតម្លៃ ៣១៣លានដុល្លារ ដែលបានចំណាយពេលសាងសង់ ១ទសវត្សរ៍ លោក Modi បាននិយាយថា៖ «ជាមួយនឹងការបើកដំណើរការផ្លូវរូងក្រោមដី នៅទីនេះ ការតភ្ជាប់នឹងមានភាពប្រសើរឡើងកាន់តែខ្លាំង»។ 

គួរបញ្ជាក់ថា ឥណ្ឌា និងចិន ដែលជាប្រទេសមានប្រជាជនច្រើនជាងគេបំផុតរបស់ពិភពលោក គឺជាគូប្រជែងដ៏ស្រួចស្រាល់ដែលកំពុងដណ្តើមឥទ្ធិពលជាយុទ្ធសាស្ត្រ នៅទូទាំងតំបន់អាស៊ីខាងត្បូង ហើយព្រំដែនរួមគ្នា ៣.៥០០គីឡូម៉ែត្ររបស់ពួកគេ គឺជាប្រភពនៃភាពតានតឹងដ៏យូរអង្វែង។

កងទ័ពនៃប្រទេសទាំង២ បានប៉ះទង្គិចគ្នាក្នុងឆ្នាំ២០២០ ដោយហេតុការណ៍ពេលនោះបានបណ្ដាលឲ្យទាហានឥណ្ឌាយ៉ាងតិច ២០នាក់ និងចិន ៤នាក់ ស្លាប់ ហើយកងកម្លាំងពីភាគីទាំង២ បច្ចុប្បន្ននេះ នៅតែប្រឈមមុខដាក់គ្នា នៅទូទាំងតំបន់ព្រំដែនដែលមានរយៈកម្ពស់ខ្ពស់ពេញដោយជម្លោះនេះ៕