សមាជិកជាង ១លាននាក់នៃក្រុមអ្នកសាសនាគ្រិស្តសាសនាដ៏មានឥទ្ធិពលឈ្មោះ Iglesia ni Cristo (INC) បានជួបជុំគ្នា នៅក្នុងទីក្រុងចំនួន ១៣ របស់ប្រទេសហ្វីលីពីន ក្នុងនោះរួមទាំងរដ្ឋធានីម៉ានីលផងដែរ ដើម្បីតវ៉ាប្រឆាំងនឹងករណីចោទប្រកាន់ទម្លាក់តំណែងដែលត្រូវបានធ្វើឡើង ចំពោះអនុប្រធានាធិបតី លោកស្រី Sara Duterte។

បើយោងតាមការប៉ាន់ស្មានផ្លូវការ បានឲ្យដឹងថា មានសមាជិករបស់ INC ប្រហែល ១,៥លាននាក់ នាំគ្នាធ្វើដំណើរសម្រុកទៅកាន់អគារប្រវត្តិសាស្ត្រ Quirino Grandstand ក្នុងទីក្រុងម៉ានីល និងទៅកាន់ដងផ្លូវជាច្រើន នៅជុំវិញនោះ វេលាម៉ោង ២រសៀល (ម៉ោងក្នុងស្រុក) នាថ្ងៃចន្ទ (ទី១៣ ខែមករានេះ)។

ទិដ្ឋភាពស្រដៀងគ្នានោះ បានកើតឡើងនៅឯទីក្រុងសំខាន់ៗផ្សេងទៀត ក្នុងប្រទេសនេះ ជាអ្វីដែលអ្នកវិភាគនិយាយថា គឺជាការបង្ហាញកម្លាំងរបស់វិហារគ្រិស្តសាសនាជាច្រើន ដើម្បីគាំទ្រលោកស្រី Duterte ដែលកំពុងមានបញ្ហា ខណៈដែលជម្លោះជាមួយសម្ព័ន្ធមិត្តពីមុនរបស់លោកស្រី គឺលោកប្រធានាធិបតី Ferdinand Marcos Jr កាន់តែមានភាពក្តៅគគុកខ្លាំងឡើងៗ។ យ៉ាងណាក្ដី គេនៅតែមិនទាន់ច្បាស់ទេថា តើលោកស្រីអនុប្រធាន នឹងបង្ហាញវត្តមានដែរ ឬយ៉ាងណា នៅពេលដែលកម្មវិធីតវ៉ាចាប់ផ្តើមជាផ្លូវការនៅវេលាម៉ោង ៤រសៀល (ម៉ោងក្នុងស្រុក)។

គួរបញ្ជាក់ថា ការប្រមូលផ្តុំនេះកើតឡើងតែប៉ុន្មានថ្ងៃបន្ទាប់ពីការស្ទង់មតិរបស់ស្ថាប័នស្ទង់មតិ ក្នុងស្រុក Social Weather Stations បានបង្ហាញថា ប្រជាជនហ្វីលីពីន ៤១ភាគរយ កំពុងគាំទ្រការចោទប្រកាន់ចំនួន ៣ករណីដែលបានប្តឹងលោកស្រី Duterte នៅចុងឆ្នាំ២០២៤ ដោយ ៣៥ភាគរយជំទាស់ ហើយ ១៩ភាគរយ នៅមិនទាន់សម្រេចចិត្ត។

ករណីចោទប្រកាន់ទម្លាក់តំណែងដែលប្តឹងដោយក្រុមសង្គមស៊ីវិលជាច្រើន ផ្តើមចេញពីការស៊ើបអង្កេតរបស់សភាតំណាងរាស្រ្ត ដែលលោកស្រី Duterte ត្រូវបានចោទប្រកាន់ពីបទប្រើប្រាស់ថវិកាសាធារណៈរាប់ពាន់លានដុល្លារដោយមិនត្រឹមត្រូវ។

លោកស្រី Duterte បានបដិសេធការចោទប្រកាន់នេះ ប៉ុន្តែលោកស្រីក៏បានធ្វើឲ្យប្រទេសភ្ញាក់ផ្អើលផងដែរ នៅពេលដែលលោកស្រីបានចេញការគំរាមកំហែងធ្វើឃាតលោកប្រធានាធិបតី កាលពីខែវិច្ឆិកា ឆ្នាំ២០២៤។ លោក Marcos បានព្យាយាមមិនជាប់ពាក់ព័ន្ធនឹងចំណាត់ការទម្លាក់តំណែងដែលគាំទ្រដោយសម្ព័ន្ធមិត្តរបស់លោក នៅក្នុងសភា ដោយហៅការធ្វើបែបនេះថា ជា «ការខ្វល់ខ្វាយនឹងរឿងរ៉ាវកំប៉ិកកំប៉ុក»៕