មេបញ្ជាការកងទ័ពឥណ្ឌា និយាយនៅថ្ងៃចន្ទនេះថា ប្រទេសរបស់លោកនឹងមិនកាត់បន្ថយចំនួនទាហាននៅតាមព្រំដែនភាគខាងជើងនៅក្នុងរដូវរងានេះនោះទេ ហើយពួកយើង នឹងពិនិត្យមើលឡើងវិញការដាក់ពង្រាយទាហានក្នុងរដូវក្តៅ ដោយផ្អែកលើលទ្ធផលនៃកិច្ចចរចាជាមួយចិន ។

កាលពីរយៈពេល ៤ឆ្នាំមុន ទាហានឥណ្ឌា ២០នាក់ និងទាហានចិន ៤នាក់ ត្រូវបានសម្លាប់ អំឡុងការប៉ះទង្គិចគ្នាតាមព្រំដែន បន្ទាប់មកភាគីទាំង ២ បានបញ្ឈប់ការល្បាតនៅត្រង់ចំណុចជាច្រើនតាមព្រំដែន ដើម្បីបញ្ចៀសការប្រឈមថ្មី ខណៈនាំទាហានថ្មីរាប់ម៉ឺននាក់ និងគ្រឿងយុទ្ធោបករណ៍កាន់តែខិតជិតតំបន់ភ្នំនៅតាមព្រំដែន ។

ទោះបីជាយ៉ាងណាក៏ដោយ ទីក្រុងញូវដែល្លី និងទីក្រុងប៉េកាំង បានឈានដល់កិច្ចព្រមព្រៀងមួយកាលខែតុលា ឆ្នាំ ២០២៤ ដើម្បីដោះស្រាយភាពទាល់ច្រកយោធារយៈពេល ៤ឆ្នាំរបស់ពួកគេ ហើយរយៈពេលប៉ុន្មានថ្ងៃក្រោយមក ពួកគេបានដកទាហានចេញពីតំបន់ព្រំដែនជម្លោះ ។

មេបញ្ជាការកងទ័ពឥណ្ឌាលោក Upendra Dwivedi បាននិយាយប្រាប់ក្រុមអ្នកសារព័ត៌មាននៅក្នុងទីក្រុងដែល្លី ថា អំឡុងការដាក់ពង្រាយរដូវរងា ចំនួនទាហានធ្លាក់ចុះ ដូច្នេះហើយយ៉ាងហោចណាស់ក្នុងយុទ្ធសាស្រ្តរដូវរងា ពួកយើងមិនរំពឹងថានឹងកាត់បន្ថយចំនួនទាហានណាមួយនោះឡើយ ។

លោកបន្តថា ដោយឡែកការសម្រេចចិត្តលើការដាក់ពង្រាយទាហាននៅរដូវក្តៅ នឹងផ្អែកលើលទ្ធផលនៃការចរចាជាមួយចិន ៕