ប្រធានាធិបតីអាមេរិកផុតអាណត្តិ លោក Joe Biden បានព្យាយាមបង្កើតរូបភាពល្អៗសម្រាប់កំណត់ត្រាគោលនយោបាយការបរទេសរបស់ខ្លួនកាលពីថ្ងៃចន្ទ (១៣ មករា) ហើយបាននិយាយថា សត្រូវរបស់សហរដ្ឋអាមេរិក មានភាពទន់ខ្សោយជាងពេលដែលលោកទើបចូលកាន់តំណែងកាលពី ៤ឆ្នាំមុន បើទោះបីជាវិបត្តិសកលដែលនៅតែមិនទាន់ដោះស្រាយបាន កំពុងកើតមានស្ទើរគ្រប់ទីកន្លែងក៏ដោយ។

មួយសប្តាហ៍មុនពេលប្រគល់តំណែងទៅឱ្យលោកប្រធានាធិបតីជាប់ឆ្នោត Donald Trump លោក Biden បានថ្លែងទៅកាន់ក្រុមអ្នកការទូតអាមេរិក នៅក្រសួងការបរទេស ហើយបានលើកសរសើរពីការគាំទ្ររបស់រដ្ឋបាលលោកសម្រាប់អ៊ុយក្រែន ប្រឆាំងនឹងការវាយលុករបស់រុស្ស៊ី ឆ្នាំ២០២២ និងសម្រាប់សង្គ្រាមរបស់អ៊ីស្រាអែល នៅមជ្ឈិមបូព៌ា។

លោក Biden លើកឡើងថា សហរដ្ឋអាមេរិកកំពុង "ឈ្នះការប្រកួតប្រជែងទូទាំងពិភពលោក" ហើយមិនត្រូវប្រទេសចិន នាំមុខផ្នែកសេដ្ឋកិច្ចដូចដែលបានព្យាករទេ ខណៈរុស្ស៊ី និងអ៊ីរ៉ង់ បានចុះខ្សោយព្រោះសង្រ្គាម ដោយគ្មានការចូលរួមដោយផ្ទាល់ពីអាមេរិក។

ក្នុងពេលដែលសង្រ្គាមនៅតែបន្តកើតមាននៅក្នុងអ៊ុយក្រែន និងមជ្ឈិមបូព៌ា ក្រុមមន្ត្រីសង្ឃឹមថា កិច្ចព្រមព្រៀងរវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីនហាម៉ាស អាចសម្រចបាន មុនពេលលោក Biden ចាកចេញពីសេតវិមាននៅថ្ងៃទី២០ ខែមករា។

លោក Biden បានប្រឈមមុខនឹងការរិះគន់ចំពោះការផ្តល់អាវុធ និងការគាំទ្រផ្នែកការទូតដល់អ៊ីស្រាអែល ខណៈលោកនិយាយថា លោកជួយអ៊ីស្រាអែលកម្ចាត់សត្រូវ រួមទាំងក្រុមហាម៉ាស នៅហ្កាហ្សា និងហេសបូឡានៅលីបង់ ដែលទាំងពីរក្រុមនេះសុទ្ធតែគាំទ្រដោយអ៊ីរ៉ង់៕