ប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump បាននិយាយកាលពីថ្ងៃចន្ទ (១៣ មករា) ថា លោកនឹងជួបជាមួយប្រធានាធិបតីរុស្ស៊ី លោក Vladimir Putin "យ៉ាងឆាប់រហ័ស" បន្ទាប់ពីលោកចូលកាន់តំណែងនៅសប្តាហ៍ក្រោយនេះ។

លោកមិនបានផ្តល់ពេលវេលាកំណត់ជាក់លាក់នោះទេ សម្រាប់កិច្ចប្រជុំដែលនឹងជាលើកដំបូងរវាងមេដឹកនាំនៃប្រទេសទាំងពីរ ចាប់តាំងពីសង្រ្គាមរុស្ស៊ី ជាមួយអ៊ុយក្រែន បានចាប់ផ្តើមនៅក្នុងខែកុម្ភៈ ឆ្នាំ២០២២ មក។

នៅពេលត្រូវសាកសួរអំពីយុទ្ធសាស្ត្ររបស់ខ្លួនក្នុងការបញ្ចប់សង្រ្គាម លោក Trump បានប្រាប់សារព័ត៌មាន Newsmax ថា "មានយុទ្ធសាស្ត្រតែមួយគត់ ហើយនោះអាស្រ័យលើរុស្ស៊ី។ លោក Putin ប្រហែលមិនសូវពេញចិត្តនឹងយុទ្ធសាស្ត្រនោះពេកទេ ព្រោះប្រាកដណាស់ថាមិនល្អឥតខ្ចោះសម្រាប់លោកឡើយ"។ មេដឹកនាំជាប់ឆ្នោតអាមេរិករូបនេះបន្ថែមថា លោកនឹងជួបជាមួយលោក Putin ឆាប់ៗនេះ ប៉ុន្តែទាល់តែលោកចូលកាន់តំណែងសិន។

សមាជិកសភាអាមេរិក លោក Mike Waltz ដែលជាទីប្រឹក្សាសន្តិសុខជាតិថ្មី បាននិយាយកាលពីថ្ងៃអាទិត្យថា លោករំពឹងថានឹងមានការហៅទូរសព្ទរវាងលោក Trump និងលោក Putin នៅក្នុង "ប៉ុន្មានថ្ងៃនិងសប្តាហ៍ខាងមុខនេះ" ជុំវិញវិបត្តិនានា រួមទាំងរឿងអ៊ុយក្រែន។

ជម្លោះរុស្ស៊ី-អ៊ុយក្រែន បានធ្វើឱ្យមនុស្សរាប់ម៉ឺននាក់ស្លាប់ ជម្លៀសខ្លួនរាប់លាននាក់ និងបង្កឱ្យមានការបែកបាក់ដ៏ធំបំផុតនៅក្នុងទំនាក់ទំនងរវាងទីក្រុងមូស្គូ និងលោកខាងលិច ចាប់តាំងពីវិបត្តិមីស៊ីលគុយបាឆ្នាំ១៩៦២ មក៕