សម្ព័ន្ធមិត្តបក្សសាធារណរដ្ឋរបស់ប្រធានាធិបតីជាប់ឆ្នោត លោក Donald Trump នៅក្នុងសភាតំណាងសហរដ្ឋអាមេរិក កំពុងព្យាយាមស្វែងរកការគាំទ្រសំណើច្បាប់មួយស្តីពីការអនុញ្ញាតលើកិច្ចចរចាសម្រាប់ការទិញកោះ ហ្រ្គីនឡែន (Greenland) នេះបើយោងតាមច្បាប់ចម្លងនៃសំណើដែលបានផ្សព្វផ្សាយកាលពីថ្ងៃចន្ទ (១៣ មករា)។

ការិយាល័យរបស់តំណាងរាស្រ្តមកពីបក្សសាធារណរដ្ឋគឺលោក Andy Ogles ដែលកំពុងដឹកនាំសេចក្ដីស្នើច្បាប់បាននិយាយថា សំណើនេះឈ្មោះថា "ញត្តិធ្វើឱ្យហ្រ្គីនឡែនអស្ចារ្យម្ដងទៀត"។

លោក Trump និយាយថា លោកចង់ធ្វើឱ្យហ្រ្គីនឡែន ជាផ្នែកមួយរបស់អាមេរិក ហើយមិនបដិសេធការប្រើអំណាចយោធា ឬសេដ្ឋកិច្ចដើម្បីបញ្ចុះបញ្ចូលប្រទេសដាណឺម៉ាក ឱ្យប្រគល់ដែនដីនេះមកឱ្យខ្លួនឡើយ។ ប្រសិនបើសេចក្តីព្រាងច្បាប់នេះត្រូវអនុម័ត វានឹងអនុញ្ញាតឱ្យលោក Trump ចូលចរចាជាមួយដាណឺម៉ាក ជុំវិញបញ្ហានេះ នៅពេលលោកចូលកាន់តំណែងថ្ងៃទី២០ ខែមករា។

តំបន់ហ្គ្រីនឡែន ត្រូវបានគ្រប់គ្រងដោយដាណឺម៉ាក អស់ជាច្រើនសតវត្សមកហើយ ដែលពីមុនជាអាណានិគម ហើយឥឡូវនេះជាដែនដីពាក់កណ្តាលអធិបតេយ្យភាព ក្រោមអាណាចក្រដាណឺម៉ាក។ កោះនេះស្ថិតនៅក្រោមរដ្ឋធម្មនុញ្ញរបស់ដាណឺម៉ាក ដែលមានន័យថាការផ្លាស់ប្តូរណាមួយចំពោះឋានៈផ្លូវច្បាប់របស់ហ្គ្រីនឡែន នឹងទាមទារឱ្យមានវិសោធនកម្មរដ្ឋធម្មនុញ្ញ។

ប្រមុខហ្គ្រីនឡែន លោក Mute Egede ដែលជំរុញឱ្យមានឯករាជ្យ បាននិយាយម្តងហើយម្តងទៀតថា កោះនេះមិនមែនសម្រាប់លក់ទេ ហើយថាវាអាស្រ័យលើប្រជាជនរបស់ខ្លួនប៉ុណ្ណោះជាអ្នកសម្រេចអនាគតរបស់ពួកគេ៕