អ៊ីរ៉ាក់៖ មនុស្សរាប់សិបនាក់បានរងរបួសកាលពីថ្ងៃសុក្រ ខណៈអ្នកគាំទ្រក្រុមជីវពលនីកាយស៊ីអ៊ីតគាំទ្រប្រទេសអ៊ីរ៉ង់ ដែលបានបោះជំរំនៅខាងក្រៅតំបន់បៃតងនៃទីក្រុងបាដាតប្រទេសអ៊ីរ៉ាក់ បានប៉ះទង្គិចជាមួយនគរបាលបង្ក្រាបកុប្បកម្ម។ ក្រុមបាតុករបានបង្កវិវាទចំពោះលទ្ធផលនៃការបោះឆ្នោតសភាកាលពីខែមុន ដែលមើលឃើញថាកងជីវពលជាអ្នកចាញ់ភាគច្រើនបំផុត។
អ្នករងរបួសនៅក្នុងការប៉ះទង្គិចគ្នាកាលពីថ្ងៃសុក្រភាគច្រើនបណ្ដាលមកពីស្រូបផ្សែង និងការគប់ដុំថ្ម។ ក្រុមបាតុករប្រមាណ ៣០០នាក់បានដើរដង្ហែក្បួនព្យាយាមសម្រុកទៅកាន់តំបន់បៃតង ដែលត្រូវបានការពារហើយបានប្រើប្រាស់ដុំថ្ម ដើម្បីគប់ទៅលើកងកម្លាំងសន្តិសុខ។ នគរបាលបានឆ្លើយតបដោយបានប្រើដំបង ឧស្ម័នបង្ហូរទឹកភ្នែក និងកាណុងបាញ់ទឹកដើម្បីរុញច្រានក្រុមបាតុករឲ្យថយក្រោយ។ ភាគច្រើននៃអ្នករងរបួសក៏ជាសមាជិកនៃកងកម្លាំងសន្តិសុខ។ បន្ទាប់ពីការបោះឆ្នោត អ្នកគាំទ្រកងជីវពលបានបោះតង់នៅជិតតំបន់បៃតង និងបានគំរាមប្រើអំពើហិង្សា លុះត្រាតែការទាមទាររបស់ពួកគេត្រូវបានបំពេញ។ នាយករដ្ឋមន្ត្រីអ៊ីរ៉ាក់លោក Mustafa al-Kadhimi បានបញ្ជាឱ្យមានការស៊ើបអង្កេតលើអំពើហិង្សានេះ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
