នគរបាល ការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់(CIO) និងអង្គភាពសេវាសន្តិសុខប្រធានាធិបតី (PSS) បានជួបប្រជុំគ្នានៅថ្ងៃអង្គារនេះដើម្បីពិភាក្សាអំពីការអនុវត្តន៍ដីកាឃាត់ខ្លួនប្រធានាធិបតី លោក Yoon Suk Yeol ជុំវិញការដាក់ច្បាប់អាជ្ញាសឹករយៈពេលខ្លីរបស់លោក។

កិច្ចប្រជុំ បានធ្វើឡើងក្នុងពេលដែលអ្នកស៊ើបអង្កេត ដឹកនាំដោយការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់(CIO) ប៉ុនប៉ងជាលើកទីពីរដើម្បីចាប់ខ្លួន លោក Yoon នៅសប្តាហ៍នេះបន្ទាប់ពីបំណងបានបរាជ័យកាលពីដើមខែនេះ។

ភាគីទាំងបី បានជួបប្រជុំគ្នារយៈពេលប្រហែលមួយម៉ោង ប៉ុន្តែតាមសេចក្តីរាយការណ៍ បានចេញលទ្ធផលតិចតួចប៉ុណ្ណោះ។

នគរបាលបាននិយាយនៅក្នុងការជូនដំណឹងទៅកាន់សារព័ត៌មានថា «យើង បានស្នើសុំកិច្ចសហប្រតិបត្តិការពីអង្គភាពសេវាសន្តិសុខប្រធានាធិបតី សម្រាប់ការប្រតិបត្តិប្រកបដោយសុវត្ថិភាព និងសន្តិវិធីចំពោះការអនុវត្តន៍ដីកានេះ ហើយកំពុងរង់ចាំការឆ្លើយតបរបស់អង្គភាព។

ការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់(CIO) និងនគរបាល តាមសេចក្តីរាយការណ៍ថា បានរៀបចំផែនការប្រមូលផ្តុំអ្នកស៊ើបអង្កេតប្រហែល១.០០០នាក់ ដើម្បីធានាឲ្យបាននូវភាពជោគជ័យក្នុងការប៉ុនប៉ងជាលើកទីពីរដើម្បីចាប់ខ្លួន លោក Yoon បន្ទាប់ពីការប៉ុនប៉ងលើកដំបូងត្រូវបានរារាំងដោយបុគ្គលិកអង្គភាពសេវាសន្តិសុខប្រធានាធិបតី ដែលរារាំងមិនឲ្យចូលទៅក្នុងលំនៅឋានផ្លូវការរបស់ លោក Yoon ក្នុងទីក្រុងសេអ៊ូល។